Бүгін, 4 наурызда Сербия парламентінде оппозициялық партиялардың депутаттары пиротехникалық заттарды қолданып, төбелес шығарды. Мәжіліс трансляциясы ҮouTube-те тікелей көрсетілді, деп хабарлайды “Адырна” ұлттық порталы.
Төбелес шамамен отырыс басталғаннан бір сағаттан кейін басталды. Депутаттар жоғары білім беруді қаржыландыруды арттыру туралы заң жобасына дауыс беруі тиіс болатын. Алайда оппозиция үкіметтің басым көпшілігі басқа да көптеген шешімдерді бір уақытта мақұлдауды жоспарлап отырғанын мәлімдеді.
Олар бұл әрекетті заңсыз деп санайды. Себебі, алдымен премьер-министр Милош Вучевич пен оның үкіметінің отставкасы туралы мәселе шешілуі керек. Вучевич бұл туралы 28 қаңтарда, жаппай наразылықтардың ортасында мәлімдеген болатын.
Оппозициялық заң шығарушылар мінбеге шығып, ысқырып, «Режим құлайтындай Сербия көтерілді!» деген жазуы және қанды алақанның бейнесі бар плакаттарды көтеріп, қарсыластармен төбелесе бастады. Парламент залында түтін бомбаларын жағып, жұмыртқа мен су бөтелкелерін лақтырды. Дәл осы уақытта оппозицияның жүздеген жақтастары парламент ғимаратының алдына наразылық шеруіне жиналды.
Сербияның үкіметтік коалициясын басқаратын Сербиялық прогрессивті партияның парламент спикері Ана Брнабич оппозицияны "террористік банда" деп айыптап, бір депутаттың ауыр жағдайға түскенін хабарлады. Associated Press агенттігінің мәліметі бойынша, кем дегенде үш депутат жарақат алған.
Еске салсақ, 2024 жылдың 1 қарашасында жақында жөндеуден өткен Нови-Сад қаласындағы орталық теміржол вокзалында бетонды шатыр құлап, 15 адам қаза тапқан болатын. Трагедиядан кейін Белградта наразылықтар басталып, олар уақыт өте келе басқа қалаларға да тарады. Демонстранттар жауапты тұлғалардың жазасыз қалмауын талап етті. Олар Нови-Сад қаласының мэрі мен премьер-министр Милош Вучевичтің отставкасын талап етті.
28 қаңтарда Вучевич отставкаға кеткенін жариялады. Ол бұл шешімнің Нови-Садтағы трагедиямен және наразылықтар кезінде бір студенттің жарақат алуымен байланысты екенін айтты. Сербия президенті Александр Вучич оның наразылықтарға алаңдамайтынын мәлімдеді.
