АҚШ президенті Дональд Трамп ел тарихында алғаш рет ағылшын тілін ресми мемлекеттік тіл ретінде бекітетін жарлыққа қол қоятынын мәлімдеді, деп хабарлайды “Адырна” ұлттық порталы The Wall Street Journal газетіне сілтеп.
Қазіргі уақытта АҚШ-та мемлекеттік тіл федералдық деңгейде заң жүзінде бекітілмеген. Тек кейбір штаттарда ғана ағылшын тілі ресми тіл болып саналады. ProEnglish ұйымының мәліметінше, бүгінде 32 штат ағылшын тілін ресми деп мойындаған.
Жаңа жарлық бұрынғы президент Билл Клинтон енгізген федералдық талапты жояды. Ол талапқа сәйкес, федералдық қаржы алатын агенттіктер мен ұйымдар ағылшын тілін білмейтін азаматтарға тілдік көмек көрсетуі тиіс болған.
АҚШ-та ағылшын тілінің мәртебесі, әсіресе, Техас штатында жиі талқыланып келеді. Онда испан тілінің кеңінен қолданылуы ұзақ жылдар бойы пікірталас тудырған. 2011 жылы Техас сенаторы иммигранттар құқығын қорғаушы белсендінің заң шығарушы органдағы тыңдауда ағылшын тілінде сөйлеуін талап еткен.
Дональд Трамптың саяси науқандары кезінде заңсыз иммиграцияға қарсы тұру және ағылшын тілінің маңыздылығын арттыру негізгі бағыттардың бірі болған. Ол 2016 жылғы сайлауалды үгіт-насихатында қарсыласы Джеб Буштың испан тілін қолданғанын сынға алып, «біз – ағылшынша сөйлейтін ұлтпыз» деп мәлімдеген еді.
