Бас әскери прокурордың бірінші орынбасары Мақсат Қазиев әскерде мүгедек болып қалған мерзімді әскери қызметші Ербаян Мұхтардың ісіне қатысты пікір білдірді. Бұл туралы ол 25 ақпанда Орталық коммуникациялар қызметінде өткен брифингте айтты, деп хабарлайды “Адырна” ұлттық порталы.
Ол әскери қызметші Мұхтар Ербаянның алған ауыр жарақатына байланысты бірқатар жедел-тергеу шаралары жүргізіліп жатқанын, сараптамалар тағайындалғанын атап өтті. Барлық дәлелдер жиналғаннан кейін шешім қабылданады. Іс Бас прокурор мен Бас әскери прокурордың ерекше бақылауында.
"Қазіргі уақытта бұл іс бойынша нақты күдіктілер жоқ. Белгілі бір топ бар, олар тергеуде", – деді Мақсат Қазиев.
Ішкі істер министрлігі Ұлттық ұланның тәрбие және әлеуметтік-құқықтық жұмысы бас басқармасының бастығы Нұрбай Бектұрсынов Ербаян Мұхтардың Түркияда емделгенін еске салды. Енді ол емдеудің екінші кезеңінен өтеді. Оған Ұлттық ұлан сарбаздары мен басқа да мемлекеттік органдар көмек көрсетті.
"Біз ата-аналармен байланыстамыз және қолдан келген көмегімізді көрсетеміз. Қызметтік тексеру жүргізілді. Ербаян Мұхтарға қатысты заң бұзушылық немесе қысым көрсету фактілері болмағаны анықталды", – деді ол.
Қорғаныс министрлігі Тәрбие және идеологиялық жұмыс департаментінің басшысы Тілеухан Басқожаев Ербаян Мұхтардың Қорғаныс министрлігінің әскери ұшағы Түркияға емделуге жеткізілгенін қосты. Алдағы уақытта бөлім оған қолдау көрсетуге дайын.
Бұған дейін Қорғаныс министрлігі Ербаян Мұхтардың 2023 жылы 4 желтоқсанда дәретханадағы плиткаға басын соғып, жарақат алғанын хабарлаған.
