Шығыс Қазақстан облысы Алтай қаласында 31 жастағы бухгалтер Ангелина Хон өз-өзіне қол жұмсады. Марқұмның туыстары оның жұмысында қысым көргенін және 3,5 миллион теңгенің жетіспеушілігі үшін айыпталғанын айтады, деп хабарлайды “Адырна” ұлттық порталы.
Қазіргі таңда “Өзін-өзі өлтіруге итермелеу” бабы бойынша қылмыстық іс қозғалып, тергеу басталды.
Ангелинаның анасы Роза Хон қызының “Достық” мейрамханасында жұмыс істегенін және соңғы екі айда қатты күйзеліске түскенін мәлімдеді. Оның айтуынша, қызына басшылық тарапынан қысым көрсетілген, әріптестері де оған қарсы қойылған.
Марқұмның туыстары мейрамхананың иесі – кәсіпкер Мұрат Сайлаубаев пен оның әйелі Мадиша Сайлаубаева жұмысты қиындатып, қызметкерлерге үлкен жауапкершілік жүктегенін айтады. Ангелина бастапқыда кассир болып жұмыс істеп, кейін бухгалтер ретінде ауыстырылған. 2024 жылдың қараша айында мекемеде тексеру жүргізіліп, 3,5 миллион теңге жетіспеушілік анықталған. Осыдан кейін басшылық оның мойнына қарыз іліп, моральдық қысым көрсеткенін айтады.
Анасының айтуынша, қызы жұмыстан кеткісі келгенімен, “шыға алмаймын, өйткені олар мені кінәлі деп ойлайды” деп айтқан. 27 қаңтарда, туған күнінде, бастығы оны жеке кабинетке қамап, айқайлап, кемсіткен. Осы оқиғадан кейін Ангелина өмірімен қоштасуға шешім қабылдаған.
Оның соңғы хаттары табылып, оларда отбасы мүшелерінен кешірім сұрап, өз өміріне түскен ауыртпалықты көтере алмағанын жазған. Бұрынғы күйеуіне хат қалдырып, оны әлі де жақсы көретінін мойындаған.
Қазіргі уақытта ШҚО полиция департаменті бұл іс бойынша тергеу жүргізіп жатыр. Туыстары әділдік талап етіп, кінәлілердің жауапқа тартылуын сұрайды. Ал кәсіпкер Мұрат Сайлаубаев пен оның әйелі бұл оқиғаға қатысты ресми түсініктеме бермеген. Журналистер де байланысқа шыққанымен, ешқандай жауап ала алмаған.
Марқұмның жақындары “Ангелинаның атына кір келтірмеу және әділ тергеу жүргізу” үшін күресетінін мәлімдеді.
