АҚШ билігі депортациялаған алғашқы мигранттар тобы, оның ішінде Қазақстан азаматтары, Коста-Рикаға жеткізілді, деп хабарлайды "Адырна" ұлттық порталы Reuters-ке сілтеп.
Коста-Рика үкіметі Вашингтонмен жасалған келісім аясында 200-ге дейін депортацияланған мигранттарды уақытша қабылдауға келіскен. Осы келісім аясында Сан-Диегодан Сан-Хосеге ұшақпен келген алғашқы топ Панама шекарасына жақын орналасқан мигранттарды уақытша орналастыру орталығына жеткізілді.
Бұл топта Қазақстаннан бөлек, Өзбекстан, Қытай, Армения, Түркия, Ауғанстан, Ресей, Грузия, Вьетнам, Әзербайжан, Иран, Иордания және Гана азаматтары да бар.
Коста-Рика билігі мигранттарға елде бір ай болуға рұқсат берді. Осы уақыт ішінде олардың отанына ерікті түрде қайтуы ұйымдастырылады. Егер кейбір мигранттар елден кетуден бас тартса, олардың жағдайы жеке тәртіпте қарастырылатын болады.
"Көпшілігі өз елдеріне қайтқысы келеді", – деді Коста-Риканың қауіпсіздік вице-министрі Омер Бадилла.
