Ұлытау облысындағы «Жомарт» кенішінде болған қайғылы оқиғада қаза тапқан Олжас Нұрілдаевтың артында бес баласы қалды, деп хабарлайды "Адырна" ұлттық порталы Ulysmedia.kz-ке сілтеп.
Марқұмның туысы Серік Дүйсенұлының айтуынша, Олжас төрт ұл, бір қыздың әкесі болған.
«Жары бар, анасы бар, інісі мен қарындасы бар. Ініміздің қазасы – біз үшін орны толмас қайғы. Ол үлкен әкесінен тәлім-тәрбие алған, жөн-жобаны білетін азамат еді. Балаларының үлкені 24 жаста, кенжесі екіде. Үкімет берген уәдесінде тұрып, балаларына қамқорлық жасаса дейміз», – дейді Серік Дүйсенұлы.
Айта кетейік, 17 ақпан күні кешке Ұлытау облысының Жаңаарқа ауданындағы «Қазақмыс» корпорациясына қарасты «Жомарт» кенішінде тау-кен массасы опырылып түскен. Құтқарушылар іздестіру жұмыстары барысында үйінді астында қалған жеті кеншінің денесін тапты.
Оқиғадан кейін Ұлытау облысында апаттан қаза тапқан кеншілердің суреттері жарияланды.
