Солтүстік Корея президенті Ким Чен Ын Украинадағы соғысқа қатысты пікір білдірді. Ол Ресейдің Украинадағы соғысын егемендігін қорғау деп атады, деп хабарлайды "Адырна" ұлттық порталы РИА Новости-ге сілтеме жасап.
Ол АҚШ пен Батыс елдерін қақтығысты созып, Ресейді стратегиялық жеңіліске ұшыратуға тырысып жатыр деп айыптады.
Ким Чен Ын Пхеньянның Ресейді тұрақты түрде қолдайтынын мәлімдеп, бұл ұстаным екі ел арасындағы "жан-жақты стратегиялық әріптестік туралы келісімге" сәйкес келетінін атап өтті. Солтүстік Корея басшысы Ресей халқының егемендігін, қауіпсіздігін және аумақтық тұтастығын қорғау ісін әділ күрес деп бағалады.
Сонымен қатар, ол Солтүстік Кореяның барлық тежеу күштерін, соның ішінде ядролық қаруларды күшейту жоспарын жариялады. Ким Чен Ынның айтуынша, АҚШ, Жапония және Оңтүстік Кореяның әскери одағы, сондай-ақ Корей түбегінде орналастырылған АҚШ-тың ядролық стратегиялық күштері аймақтағы тепе-теңдікті бұзады.
Айта кетейік, КХДР мен Ресей 2024 жылдың маусым айында Жан-жақты стратегиялық әріптестік туралы келісімге қол қойған болатын.
