Қазақстанда алғаш рет пойыз жолаушыларына сапар барысында интернет қолдану мүмкіндігі берілді, деп хабарлайды "Адырна" ұлттық порталы «Жолаушылар тасымалы» АҚ баспасөз қызметіне сілтеме жасап.
№3/4 «Астана-Алматы» бағытындағы пойыздың алғашқы рейсінде 500 жолаушы спутниктік технологиялар арқылы интернетті пайдаланып үлгерді.
«Сапар барысында жолаушылар WhatsApp арқылы хабар алмасып, YouTube-тан бейнелер көріп, басқа да танымал интернет сервистерін қолдана алады. Алайда, торренттер мен ағынды жүктеу сайттарына қолжетімділік шектелген. Локомотивке орнатылған заманауи спутниктік жабдық бүкіл маршрут бойы тұрақты әрі жоғары жылдамдықтағы интернетпен қамтамасыз етеді» – делінген хабарламада.
Бұл жаңашылдық жолаушыларға сапар барысында байланыста болуға, жұмыс істеуге және демалуға мүмкіндік береді. Алдағы уақытта «Тальго» пойыздарының барлық 15 бағытына ғаламтор қызметін енгізу жоспарланып отыр.
«Пойыздарда ғаламторды енгізу – жолаушылар тасымалын дамытудағы маңызды қадам. Біз саяхаттарды заманауи талаптарға сай ұйымдастырып, ақпарат пен байланысқа қолжетімділікті толық қамтамасыз етуге бағытталған жұмыстарды жүзеге асырудамыз», – деп мәлімдеді «Жолаушылар тасымалы» АҚ Басқарма төрағасы Әнуар Ахметжанов.
