Қазақстандық танымал блогер, продюсер және журналист Дана Орманбаеваға халықаралық іздеу жарияланды. Бұл туралы "Адырна" ұлттық порталы хабарлады.
Алматы қалалық полиция департаментінің мәліметінше, блогерге әлеуметтік желіде ұлтаралық араздықты қоздыруға бағытталған мәлімдемелер жасағаны үшін қылмыстық іс қозғалған.
"Алматылық тұрғынның әлеуметтік желілерде қорқытулар мен балағат сөздер жариялауына қатысты шағымынан кейін, полиция ұлтаралық араздықты қоздыру белгілері бойынша тергеу жүргізіп, күдіктіге қатысты қылмыстық іс қозғады. Сот шешімімен күдіктіге бұлтартпау шарасы ретінде 'қамауда ұстау' санкциясы сырттай бекітіліп, оған халықаралық іздеу жарияланды," – делінген ведомство мәлімдемесінде.
Айта кетейік, Орманбаева әлеуметтік желілерде қоғамдағы әлеуметтік және саяси мәселелерді көтеріп, өзінің белсенділігімен танымал болған тұлғалардың бірі.
