Оңтүстік Кореяда апатқа ұшыраған ұшақтың қара жәшігі туралы ақпарат тарады, деп хабарлайды "Адырна" ұлттық порталы CNN-ге сілтеп.
Boeing 737-800 ұшағының регистраторлары апатқа төрт минут қалғанда жазуды тоқтатқаны хабарланды.
Оңтүстік Кореядағы ұшақ апатын тергеп жатқан мамандар "қара жәшіктердегі" ақпаратты тексерген. Ол Бангкоктан ұшқан Jeju Air 7C 2216 рейсінің 29 желтоқсанда Муан әуежайында не себепті құлағанын анықтауға көмектеседі деп жоспарланған.
Алайда, Көлік департаменті ұшақ бортындағы ұшуды жазу құрылғысы (CVR) мен ұшу деректерін жазу құрылғысы (FDR) апатқа төрт минут қалғанда жұмыс істеуін тоқтатқанын айтты.
«CVR және FDR деректері әуе апатын тергеу үшін маңызды, бірақ тергеу әртүрлі деректер көздерін талдау арқылы жүргізіледі, сондықтан біз апаттың себебін дәл анықтау үшін бар күш-жігерімізді салуды жоспарлап отырмыз», - деді министрлік.
