2024 жылғы 26 желтоқсанда Алматы гарнизонының әскери сотында Қаңтар оқиғасы кезінде атылған Ерлан Жағыпаров пен Әуез Қапсалановтың өліміне қатысты сот-медициналық сарапшылардың есептері тыңдалды, деп хабарлайды "Адырна" ұлттық порталы "Власть" редакциясына сілтеме жасап.
Екі азамат 2022 жылғы 6 қаңтарда Алматыдағы Республика алаңында оққа ұшқан. Бұл оқиға бойынша күдікті ретінде Ұлттық гвардияның 5571 әскери бөлімінің тәрбие және әлеуметтік-құқықтық жұмысы жөніндегі орынбасары Айтжан Әубәкіров жауапқа тартылуда. Ол «қызметін асыра пайдалану» бабы бойынша айыпталып отыр.
Сот отырысында сарапшылар екі азаматтың денесінен табылған жарақаттар туралы мәлімет берді.
35 жастағы Әуез Қапсаланов төрт оқ жарақатын алған.
Жарақаттар оң қолында, арқасында екі, аяғында бір рет тіркелген. Сарапшы жарақаттардың жақын қашықтықтан емес, алыс аралықтан жасалғанын, бірақ нақты арақашықтықты анықтау мүмкін болмағанын айтты.
Ерлан Жағыпаровтың денесінен 13 жарақат табылған, бірақ сарапшы кейбір жарақаттар тура оқ тигеннен емес, жанама соққыдан болғанын атап өтті.
Оның денесінде автомат дүмімен ұрған соққы іздері анықталған. 10 оқ жарақатының ішінде кіретін, жанама, шығатын және тұйық жарақаттар бар. Денеде қалған үш оқ жарақаты тіркелген. Жарақаттар дененің әртүрлі аймақтарында: ауыз, кеуде қуысы, арқа, қолтық, білек, жамбас, тізе және иық аймақтарында болған. Барлық жарақаттар тірі кезінде салынғаны анықталды.
Іс бойынша сот талқылауы 2024 жылдың 18 желтоқсанында басталған. Алдағы сот отырыстарында тергеу материалдары мен куәгерлердің айғақтары қаралуы жоспарланған.
Айыпталушы Айтжан Әубәкіров өзінің кінәсіздігін дәлелдеуге тырысуда. Бұл іс Қаңтар оқиғасы кезінде күштік құрылымдар тарапынан жасалған әрекеттерге қатысты қоғамның ерекше назарында тұр.
