Алматы қаласы Қазақстандағы мәдениет пен спорттың басты орталықтарының бірі десек қателеспейміз. Қалада өнер мен спорт салалары кеңінен дамыған, және бұл бағыттар қала тұрғындары мен қонақтарының өмірінде айтарлықтай маңызды орын алады.
Өнер – алды қызыл тіл
Алматыда бірнеше атақты театрлар бар, олардың ішінде Абай атындағы Қазақ мемлекеттік академиялық опера және балет театры, М.Әуезов атындағы Қазақ мемлекеттік академиялық драма театры, және Лермонтов атындағы орыс драма театры ерекше орын алады. Бұл мәдени мекемелер ұлттық және халықаралық қойылымдар ұйымдастырып, Қазақстанның мәдени мұрасын дәріптеуде маңызды рөл атқарып жатыр. Киноиндустрия. Алматы Қазақстандағы киноиндустрияның негізгі орталығы. Қалада жыл сайын “Еуразия” халықаралық кинофестивалі сияқты маңызды мәдени шаралар өтеді. Сонымен қатар, көптеген қазақстандық фильмдер мен телесериалдар осы қалада түсіріліп жатады. Бұл қаланың мәдени дамуына және кино өнерінің кең таралуына өз үлесін қосып келеді. Көркемсурет және заманауи өнер. Алматыда көркемсурет галереялары мен музейлер көптеп кездестіреміз. Олардың қатарында Әбілхан Қастеев атындағы Мемлекеттік өнер мұражайы ерекше орын алады, мұнда қазақ және шетелдік суретшілердің бай коллекциялары сақталған. Сондай-ақ, заманауи өнер орталықтары мен креативті кеңістіктер, мысалы атап өтер болсақ: ARTiSHOCK театры, Tselinny Центр және Esentai Gallery сынды жаңа буын суретшілері мен дизайнерлеріүшін платформа ретінде қызмет етеді. Бұдан басқа, Алматыда түрлі музыкалық жанрлар кеңінен таралған. Қалада заманауи музыкалық фестивальдерден бастап, классикалық музыка концерттеріне дейін өтеді. Алматы симфониялық оркестрі мен түрлі халық аспаптары ансамбльдері қаланың мәдени өміріне ерекше реңк береді.
Спорт - бейбітшілік елшісі
Алматы қаласы тау шаңғысы және қысқы спорт түрлерімен танымал. Шымбұлақ тау-шаңғы курорты – халықаралық деңгейде танылған спорттық нысан, мұнда жыл сайын қысқы спорт түрлері бойынша халықаралық жарыстар ұйымдастырылады. Медеу мұз айдыны – әлемдегі ең биік орналасқан ашық мұз айдыны, онда коньки тебумен қатар түрлі жарыстар өтеді. Одан бөлек мұнда жергілікті халық демалу үшін көп жиналады. Футбол және басқа да командалық спорт түрлері. Қаланың футболдан дамуына “Қайрат” футбол клубы ерекше үлес қосып жүр. Клубтың стадионында әртүрлі деңгейдегі футбол матчтары өткізіліп, футбол сүйер қауымды жинайды. Сонымен қатар, бұл жерде баскетбол, волейбол және регби сияқты командалық спорт түрлері де танымал деп айта аламыз. Жеңіл атлетика және жаппай спорт. Алматыда жаппай спортпен айналысу үшін кеңінен дамыған инфрақұрылым бар. Қалада жүгіру жарыстары, велосипед жарыстары, марафондар мен түрлі спорттық іс-шаралар жиі өткізіліп тұрады. Әсіресе, Алматы марафоны халықаралық деңгейде белгілі шаралардың бірі. Тұрғындарда мұндай жиындарда белсенділік танытып қатысады. Күрес және жекпе-жек спорттары. Мұнда күрес, дзюдо, бокспен айналысатын спортшылардың саны көп. Бұл спорт түрлері бойынша қалада республикалық және халықаралық турнирлер өткізіліп тұрады. Қазақстандық танымал спортшылардың бірқатары осы қаладан шыққан.
Спорт инфрақұрылымы. Қалада көптеген стадиондар, спорт залдары, фитнес орталықтар және спорттық кешендер бар. Олардың ішінде “Халық Арена”, “Балуан Шолақ атындағы спорт сарайы” және “Алматы Арена” сияқты ірі спорт кешендері маңызды орын алады. Мұның барлығы Алматы қаласының спорт инфрақұрылымы жоғары деңгейде екенінің айқын дәлелі!
Қорытындылай келе, Алматы қаласы өнер мен спорт салаларында көпқырлы жетістіктерге қол жеткізіп келеді. Өнер саласы дәстүрлі мәдениет пен заманауи креативті бағыттарды ұштастырса, спорт саласы халықаралық деңгейдегі жарыстар мен жаппай спортты дамытуға дұрыс бағытталған.
Мұратқызы Айгүл
