Стокгольмдегі Нобель комитеті әдебиет саласындағы лауреаттың есімін жариялады, деп хабарлайды “Адырна” ұлттық порталы.
Биыл әдебиет бойынша Нобель сыйлығы Оңтүстік Кореяның жазушысы Хан Ганға «тарихи жарақаттарға қарсы тұрып, адам өмірінің нәзіктігін ашып көрсететін бай поэтикалық прозасы үшін» берілді.
Нобель комитетінің ресми мәлімдемесінде Хан Ганның шығармалары тарихи қарсылықтар мен байқалмайтын ережелерге қарсы тұрып, адам өмірінің нәзіктігін ерекше айқындайтыны айтылған. Жазушы тән мен жан, тірі мен өлі арасындағы байланысты терең түсініп, өзінің поэтикалық және эксперименталды стилімен қазіргі прозаға жаңашылдық әкелген.
Хан Ган 1970 жылы Оңтүстік Кореяның Кванджу қаласында дүниеге келіп, тоғыз жасында отбасымен Сеулге қоныс аударған. Сыйлық алған лауреаттың әкесі де белгілі жазушы болған. Хан Ган әдебиетпен қатар өнер мен музыкаға да ерекше көңіл бөлген. Жазушының өнері оның барлық шығармаларында айқын көрініс табады.
