Премьер-Министр Олжас Бектеновтің төрағалығымен өткен Үкімет отырысында ішкі істер министрі Ержан Сәденов жол-көлік оқиғаларын азайту мәселесін көтерді, деп хабарлайды «Адырна» тілшісі.
«Халықаралық тәжірибе жол инфрақұрылымының апатқа тікелей әсері бар екенін дәлелдеді. Қазір республикалық жолдардың тек 3%-ы ғана қауіпсіздік талаптарына сәйкес келеді. Осындай жолдарды жөндеген соң адам шығыны бірнеше есе азайды», — деді ол бүгін.
Министр қала сыртындағы жолдардың күрделі жағдайына да тоқталды. Айтуынша, олардың қазіргі жағдайы ауыр апаттарға әкеліп соғуда. Жыл басынан бері жол қауіпсіздігін жақсарту бойынша 24 мыңнан астам нұсқама берілді. Сонда да апаттар саны азаймай тұр.
Бұған қоса Ержан Сәденов шұғыл түрде 4 және одан да көп жолағы бар 6 мың шақырымнан астам жол салу қажет екенін атап өтті.
