Елтаңба авторы Жандарбек Мәлібеков Тоқаевтың мәлімдемесіне қатысты пікір білдірді. Бұл туралы ол «Азаттық» радиосына берген пікірінде айтты, деп хабарлайды “Адырна” ұлттық порталы.
Ұлттық құрылтайда Қасым-Жомарт Тоқаев елтаңбаны өзгертуді ұсынып, «Қазақстанның жаңа елтаңбасының жобасын жасауға ашық байқау жарияланады» деген болатын.
Желіде бұл ұсынысты қолдамайтындар қарасы көп болды. Ал жақтағандар елтаңбадағы жұлдызды "Кеңес одағының қалдығы» деп жазды.
Осы сынға елтаңба авторларының бірі Жандарбек Мәлібеков «Қазақтың өз жұлдыздары болған» деп жауап берді.
“Совет өкіметінен бұрын да қазақтың өз жұлдыздары болған. Мысалы, Темірқазық бар. Қазақ халқының түсінігі бойынша әрбір адамның өз жұлдызы бар. Өзбекстан туында, мысалы, 12 жұлдыз бар. АҚШ туында 50-ден астам жұлдыз бар. Шын мәнінде сараптама керек. Бәрін талқылау керек”, — деді ол «Азаттық» радиосына берген пікірінде.
Ресми түрде елтаңба авторы болып Жандарбек Мәлібековке қоса, бүгінде бақилық болған Шота Уәлиханов та бекітілген.
Осыдан біраз бұрын «Адырна» "Жаңа адамдар" жастар қозғалысы 500 адамға сауалнама жүрігізіп, олардың 70 пайызы елтаңбаны танымады деп жариялағанын хабарлаған. Іле - шала әлеуметтік желіде қазіргі елтаңбаға көңілі толмайтын азаматтар арнайы пост жаза бастаған.
Сонда депутат Аманжол Әлтаев былай деген.
- Әрине, жастарымыздың мемлекетіміздің үлкен бойтұмары елтаңбаны танымауы, білмеуі қабырғамызға бататын жағдай. Енді елтаңбаны өзгерту керек деген мәселеге өзім қосылмаймын. Өйткені бұл әбден сарапталып, таянақталып, айқындалған мемлекетміздің елтаңбасы. Сондықтан да оны өзгертудің қажеті жоқ деп есептеймін. Керісінше, мемлекеттік рәміздерді бүгінгі жас ұрпақтың санасына сіңіру бағытында балабақшадан бастап, мектеп, колледж және университетте жастарды ақпараттандыру жұмыстарын жүйелі жүргізуіміз керек. Сонымен қатар ақпарат құралдары телеарна, радиода мемлекеттік рәмізтануға бағытталған хабар болу керек. Мысалы, өз басыма елтаңба ұнайды. Елтаңба халықаралық деңгейдегі мемлекетіміздің бейнесін көрсететін өте жоғары деңгейде дайындалған. Сондықтан оған қазір аяқ астынан қозғау салудың өзі дұрыс емес. Жалпы менің бүгінгі елтаңбаға көңілім тояды, – деген еді депутат Аманжол Әлтаев.
Ал тағы бір депутат Ринат Зайытов елтаңба мен туды өзгертуге түбегейлі қарсы екенін айтқан.
- Себебі біздің елтаңбамыз бен туымыз 1991 жылғы Тәуелсіздігіміздің яғни, ең бірінші жеңісіміздің символикасы. Елтаңбаны көп адамның танымағанымен де келісемін. Себебі насихат жоқ. Мысалы, туымызды Түркияның деңгейінде насихаттай алмаймыз. Елтаңбамызды мүлде насихаттамаймыз. Бізде тіпті мемлекеттік рәміздердің авторларын білмейтін тұлғаларымыз бар. Керісінше, біз барымызды насихаттауымыз керек. Елтаңба мен ту Қазақстанның 1991 жылдан бері пайда болған тұлқұжаты секілді дүние. Мен оны өзгертуге қарсымын. Елімізде елтаңбаны өзгертуден де маңызды шаруа бар, - деген еді депутат Ринат Зайытов.
