Прокурорлар Алматыда ұлттық кинематографияны қолдауға бөлінген бюджет қаражатының ұрланғанын әшкереледі, деп хабарлайды «Адырна» ұлттық порталы.
Алматы қаласының прокуратурасы «Шәкен Айманов атындағы Қазақфильм» акционерлік қоғамын тексеру қорытындысы бойынша, бюджет қаражатын аса ірі мөлшерде ұрлау фактісімен сотқа дейінгі тергеп-тексеруді бастады. Мәліметтерге сүйенсек, фильм түсіруге бағытталған 400 миллион теңгеден астам қаражат жымқырылған.
Сотқа дейінгі тергеуді Экономикалық тергеу департаменті жүргізіп жатыр.
Еске сала кетейік, 2021 жылдың қаңтарында «Қасым хан» тарихи сериалының түсірілімі кезінде 30 миллионға жуық теңгенің ұрланғаны белгілі болды. Тергеу барысында аталған қылмысқа қатысы бар тұлғалардың қызмет бабын пайдаланып, пиротехникалық заттарды сатып алуға бөлінген бюджет қаражатын ұрлағаны дәлелденді.
«Адырна» ұлттық порталы
