Алматы облысындағы Жәпек батыр ауылының тұрғындары жасөспірімдер арасында болған төбелестің бірінші рет емес екендігін айтады, деп хабарлайды «Адырна» ұлттық порталы «Астана» телеарнасына сілтеме жасап.
Аудандық білім бөлімі Жәпек батыр ауылындағы әртүрлі мектептердің жасөспірімдері төбелес ұйымдастырғанын хабарлаған болатын. Оқиғаның желісі бойынша, жігіттер футбол ойнап, олардың арасында жанжал шығып, ол төбелеске ұласқан. Төбелес салдарынан бір бала жарақат алып, қазір ауруханада жатыр.
«Төбелес кезінде бір оқушы зардап шекті, ол қазір Алматы облысының балалар ауруханасында ем қабылдап жатыр. Жағдайы жақсы. Осы төбелеске қатысқан оқушылардың мектеп директорлары жауапқа тартылады», - дейді Алматы облысы Іле аудандық білім бөлімінің әдіскері Зарина Бақытжан.
Ал ауыл тұрғындары арна тілшілеріне екі мектеп оқушыларының арасында мұндай келіспеушілік бірінші рет болып отырған жоқ деп айтты.
«Ұлдардың арасында орта деген ұғым бар. Олар топқа бөлінеді. Ал бұл топтардың арасында түсініспеушілік туындайды. Соңғы рет мұндай келіспеушілік осындай нәтижеге әкелді», - дейді Айнұр ауылының тұрғыны.
Полицейлер жанжалға қатысқан кәмелетке толмағандардың барлық ата-аналарына қатысты ҚР ӘҚБтК-нің 127-бабы (Кәмелетке толмаған баланы тәрбиелеу, оның құқықтары мен мүдделерін қорғау жөніндегі міндеттерді орындамау) бойынша әкімшілік материалдар өндірілгенін хабарлады), ал кәмелетке толмағандардың өздеріне қатысты ҚР ӘҚБтК-нің 435-бабы (Кәмелетке толмағандар жасаған бұзақылық) бойынша хаттамалар толтырылды.
Еске сала кетейік, әлеуметтік желіде Алматы облысында мектеп оқушыларының жаппай төбелесіп жатқан видеосы тараған болатын. Тәртіп сақшыларының айтуынша, оқиға 29 қарашада облыстың Іле ауданында болған. Тексеру барысында 9-сынып оқушысы мен 10-сынып оқушысы арасында келіспеушілік туындап, кейін ол жаппай төбелеске ұласып кеткені анықталды.
«Адырна» ұлттық порталы
