Ресейдегі қазақ губернаторы, саясаткер Аман Төлеевтің денесі 22 қараша күні шіркеуден шығарылғаны айтылды. Алайда, facebook желісінде Төлеевтің мұсылман ғұрпымен ақтық сапарға шығарылып жатқан видеосы тарады, деп хабарлайды “Адырна”.
20 қараша күні Аман Төлеев 79 жасында дүниеден өтті. Ресейлік басылымдарда Төлеев Кемеровадағы шіркеуден шығарылып, денесі 90-жылдары өмірден озған Андрей есімді ұлының жанына жерленгені айтылды.
Десе де, Қазақстаннан Кемеровоға барған адамдар Төлеевтің жаназасын сырттай шығарғанға ұқсайды. Серік-Болат Маженов есімді Facebook қолданушысының парақшасында Аман Төлеевтің атын атап, қабір басында жаназа намазын оқып, қазақша дұға қайырған санаулы адамның видеосы жарияланды.
