Елімізде алғаш рет аудан және облыстық маңызы бар қалалардың әкімін сайлау өтіп жатыр, деп хабарлайды "Адырна" тілшісі Kazinform-ға сілтеме жасап.
5 қараша күні 42 аудан мен облыстық маңызы бар 3 қалада сайлау өтуде.
Мемлекет басшысы Қасым-Жомарт Тоқаев биылғы Жолдауында аудандар мен облыстық маңызы бар қалалардың әкімдері сайланатынын мәлімдеген болатын.
Аудандар мен облыстық маңызы бар қалалардың әкімдерін тікелей сайлау бастамасы мемлекеттік басқаруды орталықсыздандыруға және азаматтардың жергілікті атқарушы билік деңгейінде шешімдер қабылдауға тікелей қатысуын кеңейтуге бағытталған саяси реформалар үдерісінің маңызды кезеңінің бірі болып табылады.
Бұл сайлауды өткізу үшін қажетті құқықтық база өткен жылы қалыптасқан. Өкілеттіктерге сәйкес 17 облыстың мәслихаттары қанатқақты режімде сайлау өткізу үшін 45 аудан мен облыстық маңызы бар 3 қалалардың тізбесін бекітіп қойған болатын.
Кандидаттарды тіркеу сайлау комиссиясы бүкіл қажетті құжаттарды алғаннан кейін басталды және сайлау күніне 25 күн қалғанда жергілікті уақыт бойынша сағат 18.00-де аяқталған.
Ал сайлау алдындағы үгіт-насихат жұмыстары саяси науқанға 25 күн қалғанда және сайлау күніне дейінгі күннің жергілікті уақыты бойынша сағат 00.00-де тоқтатылды.
Сайлауға қатысуға 164 кандидат ниет білдірді. Олардың 69-ын саяси партиялар, ал 95-і өзін-өзі ұсынды.
Тіркелген үміткерлердің арасында ең үлкені Маңғыстау облысының Бейнеу ауданында — 61 жаста, ең жас кандидат Түркістан облысының Мақтаарал ауданынан түсіп отыр.
Әкімдікке үміткерлердің көпшілігі — ер адамдар. Дегенмен кандидаттар арасында 10 әйел тіркелген.
Аудандар мен облыстық маңызы бар қалалар әкімінің сайлауындағы орташа бәсеке 3-тен асады. Ең жоғары бәсеке Жетісу облысының Кербұлақ ауданында — бір орынға 6 кандидат. Ал ең төмені Ақмола облысының Шортанды ауданында — бір орынға 2 кандидат тіркелген.