Белгілі актер Азамат Сатыбалды Шәкен Айманов атындағы «Қазақфильм» акционерлік қоғамының президенті қызметіне тағайындалды. Бұл туралы Мәдениет және спорт министрлігінің баспасөз қызметі мәлімдеді, деп хабарлайды ”Адырна” ұлттық порталы.
Киностудия ұжымына жаңа басшыны Мәдениет және спорт министрі Асхат Оралов таныстырды. Министр «Қазақфильм» киностудиясының жұмысын үйлестіру абыройлы әрі жауапты міндет екенін айтты.
Отандық киноөнердің қара шаңырағы саналатын “Қазақфильм” — ауқымды және күрделі өндірістік ұйым. Былтыр киностудия жанынан «Қазақанимация» шығармашылық бірлестігі құрылды. Мемлекет басшысының киностудия жұмысын жаңғырту жөніндегі тапсырмасын іске асыру үшін 87 техникалық жабдық сатып алынды. Алдағы уақытта, модернизацияның екі кезеңін бастау керек,- деді Асхат Оралов.
Сондай-ақ, ол министрлік 2030 жылға қарай жалпы кинопрокаттағы отандық фильмдердің, оның ішінде анимациялық фильмдердің үлесін 36 пайызға дейін ұлғайтуға ниетті екенін мәлімдеді. Бұл ретте прокаттағы қазақ тіліндегі фильмдердің үлесін 30 пайызға дейін жеткізу көзделіп отыр. Министр киностудияның жаңа басшысы мен ұжымына сәттілік тілеп, табысты жұмыс атқаратынына сенім білдірді.
Айта кетейік, Азамат Сатыбалды ұзақ уақыт М.Әуезов атындағы Қазақ мемлекеттік академиялық драма театрында еңбек етті. Ғабит Мүсірепов атындағы қазақ мемлекеттік академиялық балалар мен жасөспірімдер театрын басқарды. Бүгінгі күнге дейін Темірбек Жүргенов атындағы Қазақ ұлттық өнер академиясының ректоры қызметін атқарды.
