Кореяға жұмыс істеуге кеткен қазақстандық 1,5 жылдан бері табылмай жатыр

897

Кореяға жұмыс істеуге кеткен отандасымыз бір жарым жылдан бері табылмай жатыр, деп хабарлайды «Адырна» тілшісі «Астана» телеарнасына сілтеме жасап.

Шығыс Қазақстан облысының тумасы алғашқы кезде анасымен тұрақты хабарласып тұрған. Тапқан табысын жіберіп отырған. Енді ата-ана қызынан хабар ала алмай жүргенін айтады.

Альбина Кабдулдина есепші мамандығын меңгеріп, сауда үйінде сатушы болып жұмыс істеді. Жолдасы қайтыс болып, 13 жастағы жалғыз қызымен қалады. Анасына баспана алып бермек ниетпен табысы көп жұмыс іздейді. Осы мақсатта 2019 жылы Кореяға кетеді.

«Үнемі байланыста болды. Бір емес, екі рет шығатын. Жұмыс орнын көрсететін. Қайда істеп жатқанын, зауыттарын көрсететін. Пандемия уақытында визасымен проблема болды. Сол кезде шыға алмай қалдым деді. Бірақ бастықтары керек затты әкеп беретінін айтқан. Пусан, Сеул деген қалаларды жұмыс табу үшін ауыстырып отырды. Үйге қайт дегенімде: «Мам, үйге барғанда не істеймін, табыс жоқ»,—деп жауап беретін. Әйтеуір келгеннен кейін бірдеңесін жинап, теріп, бірдеңе аламыз деп сондай ниетпен кетті ғой»,—дейді арудың анасы.

35 жастағы Альбинамен байланыс 2021 жылдың 13 маусымында үзілді. Өзін қоярға жер таппаған ана қызын тауып беремін деген айлакерлерге тап болып, 10 млнға жуық ақша берген.

«Міне, 1 жарым жыл болды. Қайда екенін білмеймін. Барлық мүмкіндікті жасадық. Дүниенің ақшасын жібердік. Бір әйел болысамын деп үлкен ақшаға алдап кетті. Енді кімге сенуге, не істеуге болатынын блмеймін», – деп мұңымен бөлісті Айгүл Болсаева.

Анасының баспаған табалдырығы, ашпаған есігі қалмады. Заңсыз мигранттардың құқығын қорғайтын «Корея көмек» қайырымдылық қорының мүшесі Самат Ахметов те отандасымызды іздеуге атсалысып келеді.

«Альбина деген қарындасымызды да ҚР Оңтүстік Кореядағы елшілігі өте жақсы көмектесіп, барлық жерге ақпараттарды таратып, тергеу және құқық қорғау органдарымен 3-4 рет кездесу өткізді. Біздің өзіміз «Корея көмек» қоры Альбинаның мамасымен тікелей байланыс орнатып, Кореяның 72 мәйітханасына барып, өлгендердің арасында бәлкім бар шығар деп іздедік, алайда өлгендердің қатарында да, миграциялық бөлімге, түрмеге түскендердің қатарында да қарындасымыздың жоқ болып шықты», – дейді ол.

Қазір Оңтүстік Кореяда 37 мыңнан астам қазақстандық бар. Олардың 11 мыңы заңсыз мигрант. Жылына сол елде із-түзсіз жоғалатын жергілікті және шетел азаматтардың саны 11 мыңнан асады.

Пікірлер
Ұқсас жаңалықтар
Серіктестер/Партнеры
Студия IMA - создание сайтов Доставка цветов Астана - Lova Buket