Қазақ елінің оқушылары робототехника бойынша Женевада өткен халықаралық FIRST GLOBAL CHALLENGE көпсайысында топ жарып, алтын жүлдені қанжығаға байлады. Бұл жайында Оқу-ағарту министрі Асхат Аймағанбетов сүйіншілерді, деп хабарлайды "Адырна" ұлттық порталы.
Темір құрылғыға жан бітіріп, ой тереңдігі, ақыл кемелдігімен байқаудың бас жүлдесін қанжығалаған Қазақстан оқушылары жайлы министр:
"Оқушыларымыз Женевада робототехникадан өткен FIRST GLOBAL CHALLENGE әлем жарысында жеңіске жетіп, рекорд орнатты. Балалармен телефон арқылы байланысып, жеңіспен құттықтадым", - деп хабарлады.
15-17 жас аралығындағы әлем оқушылары қатысқан турнирде ел намысын бес өреніміз қорғады. Олардың бәрі Ұлттық FIRST Global Challenge-дің жеңімпаздары. Үздіктер турнирге қатысқан 3 күн аясында 16 ойын матчын өткізіп, бұрын-cоңды болмаған рекордтық көрсеткіштегі ұпай жинаған.
Ақпарат үшін айта кетейік, елімізде кейінгі 3 жыл ішінде 41 IT-мектеп ашылған, білім шаңырақтарында үш мыңнан астам робототехника сыныптары бар. Оларда елу бес мыңға жуық оқушы білім алып жатыр.
"Адырна" ұлттық порталы
