Әміре Қашаубаев атындағы дәстүрлі ән орындаушылар байқауы өтеді

791

                                             

 18-19 қазанда ҚР Мәдениет және спорт министрлігінің қолдауымен Жамбыл атындағы Қазақ мелекеттік филармониясы Әміре Қашаубаев атындағы дәстүрлі ән орындаушылары байқауын ұйымдастырады, деп хабарлайды “Адырна” ұлттық порталы.

17 қазан күні сағат 12:00-де Жамбыл атындағы Қазақ мемлекеттік филармониясының Үлкен залының фойесінде Әміре Қашаубаев атындағы дәстүрлі ән орындаушылары байқауының баспасөз конференциясы өтеді. 

Аталған баспасөз мәслихатында Әміре Қашаубаев атындағы дәстүрлі ән орындаушылары байқауын дамыту және танымал ету, дәстүрлі ән өнерінің бүгінгі келбеті мен насихатталу мәселелелері талқыланады. 

Спикерлер:

  • Абдуалиев Ақан Жылқышыбайұлы - Жамбыл атындағы Қазақ мемлекеттік филармониясының директоры, Қазақстанның еңбек сіңірген қайраткері, ұйымдастыру алқасының төрағасы;
  • Жанпейісов Нұржан Қабимоллаұлы – Қазақстанның еңбек сіңірген қайраткері, Т.Жүргенов атындағы Қазақ ұлттық өнер академиясының профессоры, Ә.Қашаубаев атындағы Республикалық дәстүрлі ән орындаушылары байқауының гран-при иегері, қазылар алқасының төрағасы;
  • Жанпейісова Сәуле Стаханшылқызы - Қазақстанның еңбек сіңірген қайраткері, қазылар алқасының мүшесі;
  • Амангелді Ұзақбайұлы Күзеубай - Құрманғазы атындағы Қазақ Ұлттық консерваториясыныың Халық музыкасы факультеті, халық әндері кафедрасының меңгерушісі, доцент, қазылар алқасының мүшесі;
  • Айтбаев Ербол Хамитұлы - С.Торайғыров атындағы университеттің профессоры, Қазақстанның еңбек сіңірген қайраткері, қазылар алқасының мүшесі;

Қазақтың ән өнері тарих көшін ғасырдан ғасырға жөнелтісіп, ұрпақтан ұрпаққа мирас болып, бүгінгі күнге дейін өзінің сабақтастығын жоғалтпай келе жатыр. Ұлтымыздың аса бай ән өнерін дамытуға Біржан сал, Ақан сері, Мұхит, Жаяу Мұса, Үкілі Ыбырай, Әсет, Естай, Нартай, Кенен, Қапез сияқты халық композиторлары өлшеусіз үлес қосып, оны кәсіби деңгейге көтерді. Ал осы аға буыннан қалған мол мұраны кейінгілерге айна-қатесіз орындап жеткізуге Әміре Қашаубаев, Қали Байжанов, Ғаббас Айтбаев, Манарбек Ержанов, Жүсіпбек Елебеков, Ғарифолла Құрманғалиев, т.б. саңлақтардың қосқан еңбегі зор. Соның ішінде қазақтың әнін бұрын болмаған биік өреге көтеріп, әлемге тұңғыш рет танытқан Әміре Қашаубаевтың орны бөлек. Орындаушылық шеберлігі, ән салу ерекшелігі, үлгісі өз алдына бір мектеп десе болады. Оның орындауындағы «Ағаш аяқ», «Балқадиша», «Бес қарагер», «Дударай», т.б. әндері әлі күнге дейін халық жадында. 

        Қазақ ән өнеріндегі дара тұлға, қайталанбас дарын иесінің шығармашылығын дәріптеп, есімін ардақтап, мәңгі есте сақтау мақсатында  сексенінші жылдары Әміре Қашаубаев атындағы дәстүрлі орындаушылар байқауы бастау алды. Бұл байқау еліміздегі дәстүрлі әндерді насихаттауға арналған елеулі мәдени шара болып есептеледі. Биыл ҚР Мәдениет және спорт министрлігі байқауды қайта жандандырып, қолдап, ұйымдастыруды Жамбыл атындағы Қазақ Мемлекеттік филармония ұжымына үлкен сеніммен тапсырды. 

        Аталмыш мәдени шараның басты бағыты - қазақ халқының дәстүрлі ән өнерін дамыта отырып, дарынды жастардың орындаушылық шеберлігін ұштау, ұлы әншінің төл мұрасын кеңінен насихаттап, ұлттық ән өнерінің жетістіктерін жаңғыртып, сол арқылы жас буынның рухани жан дүниесін тәрбиелеуді мақсат тұтады. 

        Әміре Қашаубаев атындағы дәстүрлі орындаушылар байқауы көптеген талант иелерін жинады. Байқаудан кейін жас әншілердің орындаушылық шеберлігі өсіп, Отандық сахнадан өз орнын тапқандар да аз емес. Олардың қатарында ән өнерінің  саңлақтары – М.Мүкаманов, С.Жанпейісова, С.Оспанов, М.Адамбеков, Д.Өмірәлиев, С.Таудаева, Б.Үдербаева, Ғ.Мұхамедин, С. Әбдірахманов, Қ. Какимов, Е.Айтбаев,  Е.Шүкіманов,  Р.Стамғазиев, Е.Рысқали, А.Қосанова, Ә. Мұса, Е. Стамғазиев, Г. Сарина, К.Төленбаева т.б. атап өтуге болады.

        Ел іші – өнер кеніші” дейді дана халқымыз. Әрине, қазақтың дәстүрлі ән орындаушылары мұнымен шектелмесі анық. Ендеше, бұл байқау алдағы уақытта да жас өнерпаздармен толысып, бүгінгі ұрпақты халқымыздың баға жетпес мол музыкалық мұрасымен сусындата береді деп сенеміз.

 

Пікірлер
Ұқсас жаңалықтар
Серіктестер/Партнеры
Студия IMA - создание сайтов Доставка цветов Астана - Lova Buket