Білім министрі Асхат Аймағамбетов қазақстандық мектептерде жаратылыстану-математикалық пәндер бойынша сағаттар көбейтілетінін айтты, - деп хабарлайды "Адырна" тілшісі.
"Президент жаратылыстану-математикалық цикл және тілдік пәндерге басымдық беруді тапсырды. Математика, физика, химия, биология пәндерінің сағаттары көбейеді. Оқу бағдарламалары жаңартылады.
2024 жылдан бастап халықаралық тәжірибеге сәйкес үшінші сыныпта ағылшын тілін оқыту сағаттарын ұлғайту және қазақ және орыс тілдерін меңгеруге қажетті оқу жүктемесін қамтамасыз ету шаралары қабылданады», - деді министр үкімет отырысында.
Сондай-ақ, оның айтуынша, мектептердің құрылысы келесі жылы бұрын болмаған үлкен көлемде басталады.
«Мәселен, келесі жылы бір ғана елордамызда осы жоба аясында әрқайсысы екі мың оқушыға есептелген 20 жаңа мектептің құрылысын бастауды жоспарлап отырмыз», - деді министр.
Ол Мемлекет басшысының тапсырмасына сәйкес әлеуметтік осал отбасыларда тұратын балалар мектеп формасымен тегін қамтамасыз етілетінін нақтылады.
Сондай-ақ, оның айтуынша, балаларды оқытуға бюджеттен бөлінген қаражатты қамтитын білім беру шоты енгізіледі.
«Жайлы мектеп» ұлттық жобасы бойынша 800 мыңнан астам оқушы орыны енгізіледі, бұл үш ауысымды және апатты мектептер мәселесін шешеді», - деп сендірді Аймағамбетов.
Ол барлық мектептер бірыңғай стандарт бойынша салынып, жабдықталатынын атап өтті.
"Жоба аясында ашылған мектептер заманауи кабинеттермен толық қамтамасыз етіледі. Жаңа мектептерде оқу орындары көбірек болады. Бастауыш және орта сыныптар үшін де бөлек блоктар қарастырылған. Тиісінше, олар жеке спорт залдары мен асханалармен қамтамасыз етіледі", - деп толықтырды ол.
"Адырна" ұлттық порталы
