Оралда ант бергеніне 10 күн болған сарбаз психикалық орталықтан бір шықты

1051
Фото: ratel.kz
Фото: ratel.kz

Оралда ант бергеніне 10 күн болған сарбаз психикалық орталықтан бір шықты. Ол 2022 жылдың маусым айында әскер қатарына шақырылған, Оралдағы 5517 әскери бөліміне Ақтөбе облысынан келген. Бұл туралы Zakon.kz жариялады, деп хабарлайды “Адырна” ұлттық порталы.

Ол шілде айының соңында ант қабылдап, 10 күннен кейін облыстық психоневрологиялық диспансерге түскен. Сарбаздың туыстары келесі күні Оралға келген.

“Біреумен төбелесіп қалды деп ойлаймыз. Арманбек өзін ол жерден алып кетуімізді өтінді. Бұған дейін аттан құлаған, миы шайқалған. Әскерге алып кеткен кезінде тіпті тексеруден де өтпеген екен. Біз оны алып кеткіміз келеді, оның қатты соққыға жығылғанына сенеміз, бірақ олар сөйлескісі келмейді”, - дейді жауынгердің туысы Тойбазар Аманбаев.

5517 әскери бөлімінің командирі қатардағы жауынгер Арманбек Қайроштың 9 тамызда фельдшерлік пунктке барғанын айтады. Оның айтуынша, жас жігіт өзіне қол салатыны туралы көпшіліктің көзінше мәлімдеген. Командирі оны фельдшерлік пунктке әкеліп, акт жасатқан, әскери полиция денесінде ұрып-соғу белгілерінің жоқтығын тіркеген.

Ұлттық ұланның «Батыс» өңірлік қолбасшылығының басшылығы 9 тамызда саптау алаңында жігіттің жөнсіз мінез-құлық таныта бастағанын айтады.

“Біз оны фельдшерлік пунктке оқшауладық, ол жерде біздің психолог онымен сөйлесіп, психиатрдың кеңесіне жүгіну қажеттігін хабарлады. Психиатр сарбазға «бейімделудің бұзылуы» диагнозын қойып, аураханаға жатқызу туралы шешім қабылданды. Бұл материал әскери полицияда тіркелді, қызметтік тергеу тағайындалды, олар физикалық сараптама жүргізді. Біз оны психиатрға көрсетуге міндетті болдық. Өйткені біз мұндай жауапкершілікті мойнымызға ала алмаймыз. Ертең қару алып жүріп, атыс алаңына барып, құдай сақтасын, өзіне бірдеңе жасауы мүмкін”, - деді Ұлттық ұланның «Батыс» өңірлік қолбасшылығы қолбасшысының орынбасары Бақыт Алазов.

Алайда ол диагноздың алдын ала қойылғанын атап өтті. Енді сарбаз екі ай емделеді, содан кейін ол әскери-дәрігерлік комиссияға жіберіледі. Комиссия мүшелері оның қызметін жалғастыра алатынын немесе жалғастыра алмайтынын шешеді.

Бұған дейін Ұлттық ұлан Орал қаласында 10 әскери қызметшінің психикалық орталыққа жатқызылғаны туралы ақпарат жоққа шығарылды. Орталықта жалғыз сарбаз жатқаны белгілі болды.

”Адырна” ұлттық порталы

Пікірлер
Ұқсас жаңалықтар
Серіктестер/Партнеры
Студия IMA - создание сайтов Доставка цветов Астана - Lova Buket