2025 жылғы 1 қарашадағы мәлімет бойынша, жұмыссыздыққа байланысты әлеуметтік төлемдерді МӘСҚ-тен алушылар саны 308,4 мың адамды құрады. Бұл туралы Еңбек министрлігі мәлімдеді, деп хабарлайды "Адырна".
Ақпаратқа сәйкес, олардың ішінде 268,6 мың адам осы жылы алғаш рет төлем тағайындатқан. Жалпы төлем сомасы 106,8 млрд теңгеге жеткен. 2024 жылғы көрсеткіш бойынша, МӘСҚ арқылы әлеуметтік төлемдерді 1,4 млн қазақстандық алған.
Жәрдемақының ұзақтығы 1-ден 6 айға дейінгі аралықта өзгереді және жоғалған табыстың 45%-ына дейінгі мөлшерде беріледі, бұл жұмыс өтілі мен соңғы екі жылдағы орташа табысқа байланысты.
Айта кетейік, Қазақстанда жұмыссыздық бойынша төлемдер азамат ресми түрде жұмыссыз мәртебесін алған күннен бастап есептеледі.
Алайда, оны алу үшін мынадай шарттар сақталуға тиіс:
- өтініш беруші ресми түрде жұмыс істеген болуы керек;
- ол үшін кемінде 6 ай бойы әлеуметтік аударымдар жүргізілген болуы қажет;
- азамат ресми түрде жұмыссыз мәртебесін алуы керек.
