Әзербайжан президенті Ильхам Әлиев пен Қырғызстан президенті Садыр Жапаров мемлекет басшысы Қасым-Жомарт Тоқаевты және Қазақстан халқын Құрылтайдың алғашқы сайлауының сәтті өтуімен құттықтады, деп хабарлайды «Адырна» тілшісі.
«Қазақстанның қоғамдық-саяси өміріндегі жаңа тарихи кезеңнің басталуын білдіретін бұл маңызды оқиға еліңіздің жан-жақты дамуына, сіздің бастамаңызбен жүзеге асырылып жатқан ауқымды реформалардың жалғасуына және алдағы міндеттердің орындалуына қызмет етеді деп сенемін. Құрылтай жұмысына толағай табыс тілеймін», – делінген президент Әлиевтің құттықтау хатында.
Ал Қырғызстан басшысы стратегиялық әріптестік пен одақтастық қатынастар алдағы уақытта да нығая түсіп, екі ел халқының игілігі үшін, сондай-ақ бүкіл Орталық Азиядағы бейбітшілік, тұрақтылық пен дамуды қамтамасыз ету мақсатында жаңа мазмұнмен толыға беретініне үміт білдірді.
«Азаматтардың еркін таңдауы нәтижесінде қалыптасқан Құрылтай Қазақстанның мемлекеттілігін нығайтуға, құқықтық және қоғамдық-саяси институттарды жетілдіруге, сондай-ақ елдің тұрақты әлеуметтік-экономикалық дамуын қамтамасыз етуге елеулі үлес қосатынына кәміл сенемін. Сізге зор денсаулық, мемлекеттік қызметіңізге табыс, ал бауырлас Қазақстан халқына бейбітшілік пен өркендеу тілеймін»,– деді ол.
