Қырғызстандық компаниялар Қытай ұлттық мұнай-газ корпорациясымен (CNPC) мұнай өнімдерін жеткізу туралы келісімдерге қол қойды. Бұл туралы 19 тамызда Қырғызстан үкіметінің баспасөз қызметі жазды, деп хабарлайды «Адырна» тілшісі.
Құжаттарға Үрімші қаласында өткен келіссөздердің қорытындысы бойынша қол қойылған. Кездесулер Қырғызстан Министрлер кабинеті төрағасының орынбасары Эрлист Акунбековтің Қытайдың Шыңжаң-Ұйғыр автономиялық ауданына жасаған жұмыс сапары аясында ұйымдастырылған. Делегация құрамында мұнай өнімдері нарығында жұмыс істейтін оннан астам қырғызстандық компанияның басшылары болған.
CNPC компаниясының бас директоры Ло Ичжоумен өткен кездесуде корпорация құрамына кіретін «Куньлунь Логистик» компаниясы арқылы жеткізу рәсімдеріне ерекше назар аударылған. Компания мұнай кен орындарына қатысты жүктерді, шикі мұнайды, табиғи газды және мұнай өнімдерін халықаралық тасымалдау мен қоймалық логистикамен айналысады.
Тараптар тасымалдау үдерісін жеңілдету мәселелерін де талқылаған. Атап айтқанда, Қырғызстанның Энергетика министрлігі жалпы жұмысты үйлестіруі, Көлік және коммуникациялар министрлігі Кеден қызметімен бірлесіп мұнай жүктерінің шекарадан жедел өтуін қамтамасыз етуі, ал Сыртқы істер министрлігі жүргізушілерге виза рәсімдеу тәртібін жеңілдетуі тиіс екені айтылған.
Ло Ичжоу Қырғызстанмен ынтымақтастықты дамытуға, жүктерді кедендік рәсімдеуді жетілдіруге және Қытай–Қырғызстан бағыты бойынша үздіксіз энергетикалық логистикалық дәліз қалыптастыруға дайын екенін мәлімдеді.
Өз кезегінде Эрлист Акунбеков Орталық Азиядағы мұнай нарығындағы ахуалды ескере отырып, қырғызстандық компаниялар мен CNPC арасында тікелей келісімдер жасаудың маңыздылығын атап өтті.
Акунбеков бастаған делегация Қытай Коммунистік партиясы Шыңжаң-Ұйғыр автономиялық ауданы комитетінің хатшысы Чэнь Сяоцзянмен де кездескен. Кездесу қорытындысында Қытайдан Қырғызстанға жанар-жағармай материалдарын жеткізу үдерісін жеңілдету және жеделдету жөнінде келісімге қол жеткізілген.
CNPC мен Sinopec – Қытайдағы ең ірі мемлекеттік мұнай-газ корпорациялары. Олар мұнай мен табиғи газды барлау, өндіру және өңдеу, сондай-ақ мұнай өнімдерін халықаралық құбыр жүйелері арқылы тасымалдаумен айналысады.
Қырғызстан жыл сайын шамамен 2 миллион тонна жанар-жағармай материалдарын тұтынады. Оның 95 пайызға жуығын ел Ресейден импорттайды. Алайда соңғы айларда украиналық дрондардың Ресей мұнай өңдеу зауыттарына жасаған шабуылдары салдарынан мұнай өнімдерін жеткізуде қиындықтар туындады. Осының аясында Қырғызстанда бензин мен дизель отынының бағасы қымбаттап, кейбір жанармай құю бекеттерінде АИ-95 маркалы бензин мен дизель отынының тапшылығы байқалды.
2026 жылдың шілде айында Қырғызстан президенті Садыр Жапаров Министрлер кабинетіне жанар-жағармайдың тұрақты жеткізілуін қамтамасыз етіп, тапшылыққа жол бермеуді тапсырған еді. Сатып алу және ішкі нарықтағы баға айырмасын өтеу үшін үкімет 25 мамыр мен 30 қыркүйек аралығында импортталатын отынды субсидиялау тетігін енгізді.
Шілде айының ортасына қарай Қырғызстанға Қытай мен Беларусьтен мұнай өнімдерінің алғашқы партиялары жеткізіле бастады. Сонымен қатар билік Қазақстан және Өзбекстанмен де жеткізу мәселесі бойынша келіссөздер жүргізіп жатыр. Ресеймен ай сайын Қырғызстанға 100 мың тонна бензин жеткізу жөнінде келісім жасалған.
CNPC және Sinopec компанияларымен жасалған жаңа келісімдер импорт көздерін әртараптандырып, республиканың бір ғана жеткізушіге тәуелділігін азайтуға мүмкіндік бермек.
