ۋكراينا اسكەريلەرى ەۋروپاداعى جەڭىس كۇنىنە ارنالعان 80 جىلدىق اسكەري پارادقا قاتىسادى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
ۋكراينا قارۋلى كۇشتەرىنىڭ وكىلدەرى 8 مامىردا ۇلىبريتانيا استاناسى لوندوندا وتەتىن ەۋروپاداعى جەڭىستىڭ 80 جىلدىعىنا ارنالعان اسكەري پارادقا قاتىسادى.
«ۋكراينا قارۋلى كۇشتەرى ەۋروپاداعى جەڭىستىڭ 80 جىلدىعىنا ارنالعان سالتاناتتى شەرۋگە قوسىلادى. ولاردىڭ قاتىسۋى بىزگە ۋكراينانىڭ قازىر ەركىندىك ءۇشىن كۇرەستىڭ الدىڭعى شەبىندە تۇرعانىن ەسكە سالادى»، – دەپ جازدى ۇلىبريتانيا قورعانىس مينيسترلىگى 3 مامىردا الەۋمەتتىك جەلىدە.
ءىس-شاراعا ۇلىبريتانيادان شامامەن 1000 اسكەري قىزمەتكەر قاتىسادى. كورولدىك اسكەري-تەڭىز فلوتى، كورولدىك تەڭىز جاياۋ اسكەرى، بريتان ارمياسى جانە كورولدىك اسكەري-اۋە كۇشتەرى.
بۇل ۋكرايناعا بۇكىل الەمنىڭ قولداۋىن بىلدىرەدى جانە رەسەيدىڭ ارانداتۋسىز، زاڭسىز باسقىنشىلىعىنا قارسى كۇرەستىڭ جالعاسىپ جاتقانىن كورسەتەدى، دەپ اتاپ ءوتتى ۇلىبريتانيا قورعانىس مينيسترلىگى.
پارادقا Interflex وپەراتسياسىنا قاتىسقان ۋكراينالىق اسكەري قىزمەتشىلەر قاتىسادى. بۇل ۇلىبريتانيادا ۋكراين اسكەرىن دايارلاۋ باعدارلاماسى. اتالعان باعدارلاما اياسىندا لوندون مەن ونىڭ وداقتاستارى رف تاراپىنان باستالعان كەڭ اۋقىمدى سوعىس باستالعالى بەرى ۋكراينادان 54 مىڭنان استام اسكەري قىزمەتكەردى وقىتتى.
لوندوندا وتەتىن سالتاناتتى شەرۋگە ۋكراينا تاراپىنان قانشا ادام قاتىساتىنى ناقتىلانباعان.
ەۋروپاداعى جەڭىس كۇنى جىل سايىن 8 مامىردا اتاپ وتىلەدى – بۇل وداقتاستاردىڭ گەرمانيانىڭ 1945 جىلى كاپيتۋلياتسياسىن رەسمي تۇردە قابىلداعان كۇنى. ال رەسەي، بەلارۋس جانە بۇرىنعى كسرو-نىڭ كەي ەلدەرى بۇل كۇندى 9 مامىردا اتاپ وتەدى.
