سولتۇستىك قازاقستان وبلىسىنداعى تەپليچنوە اۋىلىندا ەلدى مەكەندى سۋ باسۋدان ساقتاۋ ءۇشىن بوگەتتى بەكىتۋ جۇمىستارى ءۇشىنشى كۇن قاتارىنان جۇرگىزىلۋدە، دەپ حابارلايدى "ادىرنا" ۇلتتىق پورتالى.
ەسىل وزەنىندەگى سۋ دەڭگەيى ءالى دە كوتەرىلىپ جاتىر. ءوڭىر اكىمى عاۋەز نۇرمۇحامبەتوۆ جاعدايدى كۇن سايىن باقىلاۋدا ۇستاپ وتىر.
ء"ۇش كۇننەن بەرى تاۋلىك بويى جۇمىس ىستەپ جاتىرمىز. تەپليچنوە اۋىلىنداعى قورعانىس بوگەتىن نىعايتۋ بارىسىن ءوزىم تىكەلەي باقىلاپ ءجۇرمىن. كەشە 30 مىڭ قادام جۇرسەم، بۇگىن دە سونداي قاشىقتىق ءجۇردىم", – دەپ جازدى عاۋەز نۇرمۇحامبەتوۆ الەۋمەتتىك جەلىدەگى پاراقشاسىندا.
وقيعا ورنىندا بارلىق قاجەتتى تەحنيكا جۇمىلدىرىلعان، شاتىرلار تىگىلگەن، تاماقتانۋ ۇيىمداستىرىلعان. جۇمىسقا 1600-گە جۋىق ادام – كاسىپورىندار مەن ۇيىمداردىڭ قىزمەتكەرلەرى، مەملەكەتتىك قىزمەتكەرلەر، اسكەري قىزمەتكەرلەر جانە قۇتقارۋشىلار قاتىسۋدا.
سونداي-اق، كومەككە كورشىلەس وڭىرلەردەن قۇتقارۋ بريگادالارى كەلگەن. 90 مىڭ قاپشىق توسەلىپ، سۋ تولتىرىلعان بوگەت ورناتىلدى. ءوڭىر اكىمى حالىقپەن كەزدەسىپ، بارلىق قيىندىقتارعا قاراماستان كۇن-ءتۇن دەمەي ەڭبەك ەتىپ جاتقان ازاماتتارعا شىنايى العىسىن ءبىلدىردى.
"باستى مىندەت – ەلدى مەكەننىڭ تولىق قاۋىپسىزدىگىن قامتاماسىز ەتۋ. بارلىق قاۋىپتەر جويىلعانعا دەيىن جۇمىستى جالعاستىرامىز", – دەدى سقو اكىمى.
قازاقستان رەسپۋبليكاسى توتەنشە جاعدايلار مينيسترلىگى (تجم) تەپليچنوە اۋىلىندا بوگەتتى بەكىتۋ جۇمىستارىنا سۇڭگۋىرلەر دە تارتىلعانىن حابارلادى. مۇنداي شارالار جەلدىڭ كۇشەيۋىنە جانە تولقىننىڭ بوگەتكە تيگىزەتىن كەرى اسەرىنە بايلانىستى قابىلدانعان.
اۋىل تۇرعىندارى 25 ساۋىردە ەۆاكۋاتسيالانعان بولاتىن. ءار ەكى ساعات سايىن ەسىل وزەنىندەگى سۋ دەڭگەيى 1-2 سم-گە كوتەرىلۋدە. سۋ تاسقىنىنىڭ شارىقتاۋ شەگى 28-30 ءساۋىر كۇندەرى كۇتىلۋدە.
