«بيپەك اۆتو – ازيا اۆتو» كومپانيالار توبى ديرەكتورلار كەڭەسىنىڭ توراعاسى اناتولي بالۋشكين قىلمىستىق كودەكستىڭ 190-بابى، 4-بولىگى، 2-تارماعى — «اسا ءىرى كولەمدە جاسالعان الاياقتىق» بويىنشا كىنالى دەپ تانىلدى، دەپ حابارلايدى "ادىرنا" ۇلتتىق پورتالى.
وعان 9 جىل باس بوستاندىعىنان ايىرۋ جازاسى تاعايىندالدى. سونىمەن قاتار، ول 10 جىل بويى كوممەرتسيالىق ۇيىمداردا باسشىلىق قىزمەت اتقارۋ قۇقىعىنان ايىرىلدى. جازاسىن قىلمىستىق-اتقارۋ جۇيەسىنىڭ ورتاشا قاۋىپسىزدىك مەكەمەسىندە وتەيتىن بولادى.
«ازيا اۆتو» اق-نىڭ باس ديرەكتورى ەرىك ساعىمباەۆ تا قىلمىستىق كودەكستىڭ 190-بابى 4-بولىگى 2-تارماعى («اسا ءىرى كولەمدە جاسالعان الاياقتىق») جانە 245-بابى 3-بولىگى («سالىق تولەۋدەن جالتارۋ، قىلمىستىق توپپەن نە اسا ءىرى مولشەردە جاسالعان») بويىنشا كىنالى دەپ تانىلدى. وعان 8 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. ول دا 10 جىل بويى كوممەرتسيالىق ۇيىمداردا باسشىلىق قىزمەتكە تاعايىندالا المايدى. جازاسىن ورتاشا قاۋىپسىزدىك مەكەمەسىندە وتەيدى.
ايىپتالۋشىلار سوت زالىندا بولماعان. ولارعا ۇكىم سىرتتاي شىعارىلدى.
اتالعان قىلمىستىق ءىس بويىنشا جابىرلەنۋشىلەر رەتىندە Jusan Bank پەن يندۋستريا جانە ينفراقۇرىلىمدىق دامۋ مينيسترلىگى (قازىرگى – ونەركاسىپ جانە قۇرىلىس مينيسترلىگى) تانىلعان.
جابىرلەنۋشى تاراپتىڭ (قازاقستان رەسپۋبليكاسىنىڭ ونەركاسىپ جانە قۇرىلىس مينيسترلىگى) ماتەريالدىق شىعىندى ءوندىرۋ جونىندەگى ازاماتتىق تالابى قاناعاتتاندىرىلمادى. ۇكىم ءالى زاڭدى كۇشىنە ەنگەن جوق.
بالۋشكين مەن ساعىمباەۆ 2021 جىلعى تامىزدان بەرى ىزدەۋدە ءجۇر. تەرگەۋ نۇسقاسى بويىنشا، ولار بانكتىك نەسيەلەر مەن سالىقتاردان جالتارۋ ماقساتىندا 230 ملرد تەڭگەنى جىمقىرعان. بۇل قارجى اۆتوموبيلدەردى ونەركاسىپتىك جولمەن قۇراستىرۋ زاۋىتىن سالۋعا بولىنگەن بولاتىن.
