Ticketon سايتىنىڭ ديرەكتورى الەكسەي لي Threads الەۋمەتتىك جەلىسىندە ساتىپ الۋشىلارعا ۇندەۋ جاساپ، دجەننيفەر لوپەستىڭ كونتسەرتىنە بيلەت ساتۋ كەزىندە تۋىنداعان تەحنيكالىق اقاۋلارعا بايلانىستى كەشىرىم سۇرادى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، كوماندا ينفراقۇرىلىمدى الدىن الا كۇشەيتىپ، سەرۆەرلەر سانىن ءۇش ەسەگە ارتتىرعانىمەن، حالىقتىڭ قىزىعۋشىلىعى كۇتكەننەن الدەقايدا جوعارى بولىپ، سايت جۇكتەمەگە شىداس بەرمەي ىستەن شىققان. اقاۋ ورىن العاننان كەيىن تەحقىزمەتتەر Cloudflare كومپانياسىنىڭ ەلەكتروندى كەزەك جۇيەسىن شۇعىل ەنگىزدى. الايدا اسىعىستىقپەن كەيبىر تەحنيكالىق نيۋانستار ەسكەرىلمەي، تاپسىرىستاردىڭ قايتالانۋ قاۋپى تۋىنداعان.
«ساتىلىمدى توقتاتىپ، ءتۇنى بويى قايتالانعان تاپسىرىستاردى انىقتاپ، الىپساتارلاردى الىپ تاستاپ، ءار كليەنت ءۇشىن جەكە شەشىم ىزدەدىك. تۇنگى 1-دە تازا بازا جاساپ، دۇرىس ساتىپ العاندارعا ەلەكتروندى بيلەت جىبەرە باستادىق. قازىر دە كوماندا 24 ساعات بويى جۇمىس ىستەۋدە»، – دەدى الەكسەي لي.
ول بارلىق جاعدايدىڭ ءادىل شەشىلەتىنىن ايتىپ، كوپشىلىگىنە بيلەت كلاسى اقىسىز جوعارىلاتىلاتىنىن حابارلادى. ال باعاسى تومەنىرەك ساناتتاعى ورىندارعا وتكەن كەي ادامدارعا (شامامەن بىرنەشە ءجۇز ادام) بيلەت قۇنى تولىق قايتارىلىپ، ءىس-شاراعا تەگىن قاتىسۋ مۇمكىندىگى بەرىلمەك.
سونداي-اق، الەكسەي لي پلاتفورمانىڭ جاڭارتىلعان نۇسقاسى الداعى ايلاردا كەزەڭ-كەزەڭمەن ىسكە قوسىلاتىنىن ايتتى. باستاپقىدا ول قىركۇيەككە جوسپارلانعان.
ايتا كەتەيىك، دجەننيفەر لوپەستىڭ كونتسەرتى 1 تامىزدا استانادا وتەدى. بۇل – الەمدىك جۇلدىزدىڭ قازاقستانعا العاشقى ساپارى. بيلەتتەر 11 ساۋىردە ساتىلىمعا شىقتى. كوپتەگەن قولدانۋشىلار سايتتىڭ دۇرىس جۇمىس ىستەمەگەنىن، اقشا شەشىلىپ، بىراق بيلەت بەرىلمەگەنىن ايتىپ شاعىمداندى. سوعان قاراماستان، بارلىق بيلەتتەر بىرنەشە ساعات ىشىندە ساتىلىپ كەتتى. كەيىنىرەك جەلىدە بيلەتتەردىڭ OLX ارقىلى قايتا ساتىلىپ جاتقانى تۋرالى اقپارات تارادى.
