وزبەكستان پرەزيدەنتى شاۆكات ميرزياەۆ ءتۋريزمدى دامىتۋ باعىتىنداعى جۇمىسقا جاۋاپتى مينيسترلىك وكىلدەرى مەن بىرقاتار ايماقتىق اكىمدەردى (حوكيمدەردى) سىنعا الدى. بۇل تۋرالى مەملەكەت باسشىسىنىڭ ءباسپاسوز حاتشىسى شەرزود اسادوۆ مالىمدەدى، دەپ حابارلايدى "ادىرنا" ۇلتتىق پورتالى.
پرەزيدەنتتىڭ ايتۋىنشا، جەرگىلىكتى باسشىلار ءتۋريزمنىڭ ەل ەكونوميكاسىنداعى ماڭىزدى ءرولىن تۇسىنبەي وتىر. ول كاپسۋلا ۇيلەر كەشەنى تەك كيتابتا عانا سالىنعانىن مىسال ەتىپ كەلتىردى. ال مۇنداي كەشەندەر 35 اۋدان مەن قالادا سالىنۋى ءتيىس بولعان.
سونداي-اق، شەتەلدىك تۋريستەر جول ساپاسىنا ءجيى شاعىمداناتىنى ايتىلدى. وسىعان بايلانىستى «تۋريستىك شەڭبەرگە» كىرەتىن ايماقتارداعى جولداردى جوندەۋ تاپسىرىلدى.
ميرزياەۆ تۋريستىك اۋىلداردى دامىتۋ جۇمىستارى ءۇش جىل بۇرىن باستالعانىمەن، ءالى دە بىرقاتار وبلىستاردا باياۋ ءجۇرىپ جاتقانىن اتاپ ءوتتى. مىسالى، تاشكەنت وبلىسىنداعى جوبا قاعاز جۇزىندە قالسا، قاشقاداريا مەن جىزاقتا ءبىر عانا اۋىل ىسكە قوسىلعان.
ايماقتاردا گاسترونوميالىق جانە قولونەر ءتۋريزمىنىڭ دامىماۋى سالدارىنان جىزاق پەن سۋرحانداريا وبلىستارى تۋريزمنەن $65 ملن، سىرداريا – $30 ملن ەكسپورتتىق تابىسقا دا جەتە الماعان.
پرەزيدەنت تۋريستىك ورىنداردان تۇسەتىن تابىستىڭ اشىق تىركەلمەي وتىرعانىنا الاڭداۋشىلىق ءبىلدىرىپ، تانىمال نىسانداردا كەلۋشىلەردىڭ سانىن اۆتوماتتى تۇردە ەسەپتەيتىن قۇرىلعىلار ورناتۋدى تاپسىردى.
سونداي-اق، ول تاريحي مۇرا نىساندارىن قالپىنا كەلتىرۋ جۇمىستارىنا جەكە سەكتوردى تارتۋ قاجەتتىگىن ايتىپ، بۇل باعىتقا قوسىمشا $4 ملن گرانت قاراستىرىلاتىنىن جەتكىزدى.
ميرزياەۆ يۋنەسكو تىزىمىنە ەنگەن زارافشان–قاراقۇم ءدالىزىن ءتيىمدى پايدالانۋ بويىنشا ۇسىنىس بولماعانىن سىناپ، بۇل باعىتتا جاڭا باستامالار ازىرلەۋدى تاپسىردى.
ايتا كەتەيىك، 2024 جىلى وزبەكستان تۋريزمىنەن تۇسكەن تابىس $3,5 ملرد-قا جەتىپ، شەتەلدىك تۋريستەر سانى العاش رەت 10 ميلليوننان اسقان. ەل بيلىگى 2040 جىلعا قاراي ءتۋريزمنىڭ ءجىو-دەگى ۇلەسىن 7%-عا، ال ەكسپورت كولەمىن $10 ملرد-قا جەتكىزۋدى جوسپارلاپ وتىر.
