2025 جىلدىڭ 5-6 ساۋىرىندە ەلىمىزدىڭ تۇكپىر-تۇكپىرىنەن كەلگەن جاستاردىڭ باسىن قوسقان TEO CUP XIV رەسپۋبليكالىق دەبات ءتۋرنيرى ءوز ماقساتىنا جەتىپ، جوعارى دەڭگەيدە ءوتتى. بۇل ءىس-شارا ەل اۋماعىندا ينتەللەكتۋالدىق پىكىرتالاس پەن بىلىمگە دەگەن سۇرانىستى ارتتىردى، ال جەڭىمپازدار اقشالاي سىيلىقتار ماراپاتتالدى.
تۋرنيرگە ەلىمىزدىڭ 8 ايماعىنان: الماتى، تاراز، شىمكەنت، اقتوبە، استانا، قاراعاندى، اتىراۋ جانە سەمەي قالالارىنان كەلگەن پىكىرسايىسشىلار قاتىستى. اۋقىمدى پىكىرسايىس الاڭىندا 92 كوماندا, 184 قاتىسۋشى باق سىناپ، ءوز بىلىمدەرىن، شەشەندىك شەبەرلىكتەرىن جانە سىني ويلاۋ قابىلەتتەرىن كورسەتتى. تۋرنيرگە 500-دەن استام كورەرمەن قاتىسىپ، بەلسەندى قولداۋ ءبىلدىردى.
وسىنداي اۋقىمدى جوبانىڭ ءساتتى جۇزەگە اسۋىنا ءبىر عانا ۇيىمداستىرۋ جەتكىلىكسىز ەكەنى انىق. ءىس-شارانىڭ جوعارى دەڭگەيدە وتۋىنە، قاتىسۋشىلاردىڭ شابىتتانىپ، جەڭىمپازداردىڭ باعالى سىيلىقتارعا يە بولۋىنا بىرقاتار دەمەۋشىلەر مەن سەرىكتەستەردىڭ قولداۋى ەرەكشە اسەر ەتتى.
TEO CUP XIV جەڭىمپازدارى مەن سىيلىقتار:
الفا ليگاسى جەڭىمپازدارى:
- حان ءتاڭىرى — 300 000 تەڭگە، ۋمرا ساپارىنا 2 سەرتيفيكات
- ماسساگەت — 200 000 تەڭگە، «شاپان نۇر» برەندىنە 20% جەڭىلدىك, «كايدزەن» كىتابى (2 دانا)
- Old School جانە ادىلەتتى قازاقستان — 100 000 تەڭگە (ارقايسىسى), «شاپان نۇر» برەندىنە 10% جەڭىلدىك, «كايدزەن» كىتابى (4 دانا)
بەتتا ليگاسى جەڭىمپازدارى:
- الاساپىران — 100 000 تەڭگە، تۇركيا ساپارىنا 2 سەرتيفيكات
- Veni Vidi Vici — 60 000 تەڭگە، «شاپان نۇر» برەندىنە 10% جەڭىلدىك, «كايدزەن» كىتابى (2 دانا)
- يرينا كايراتوۆنا جانە Dragonlore — 30 000 تەڭگە (ارقايسىسى), «شاپان نۇر» برەندىنە 10% جەڭىلدىك
جەكە نوميناتسيالار:
- ەڭ ۇزدىك سپيكەر — الىبەك ساندىبەك (80 000 تەڭگە)
- ۇزدىك سپيكەر — ازامات ارىنوۆ (40 000 تەڭگە)
TEO CUP XIV اياسىندا ۇيىمداستىرىلعان تاعى ءبىر ەرەكشە شارا — «ميلليون كىمگە بۇيىرادى؟» اتتى ينتەللەكتۋالدىق ويىنى بولدى. قاتىسۋشىلار لوگيكا، ەرۋديتسيا جانە جىلدام ويلاۋ قابىلەتتەرى بويىنشا سىنالىپ، تارتىستى ويىن ناتيجەسىندە ساپارعالي باتىرجان جەڭىمپاز اتاندى.
وعان تۇركيا ەلىنە جولداما تابىستالدى. بۇل جەڭىس – ونىڭ تەرەڭ ءبىلىمى مەن زەرەكتىگىنىڭ دالەلى.
TEO CUP XIV ءتۋرنيرى – بۇل پىكىرسايىس مادەنيەتىن نىعايتۋعا، جاستاردىڭ سىني ويلاۋىن دامىتۋعا، كوشباسشىلىق قابىلەتتەرىن قالىپتاستىرۋعا باعىتتالعان ماڭىزدى قادام بولدى. ءىس-شارا جوعارى ۇيىمداستىرۋشىلىق دەڭگەيدە ءوتىپ، ەلىمىزدەگى ينتەللەكتۋالدى جاستار ءۇشىن ۇلكەن سەرپىن بەردى.
