قىتايداعى ۇلتى قازاق ەربول زىقانۇلى گانسۋ پروۆينتسياسىنىڭ چجانە قالاسىنا اكىم بولىپ سايلاندى، دەپ حابارلايدى "ادىرنا" ۇلتتىق پورتالى The Paper باسىلىمىنا سىلتەمە جاساپ.
چجانە قالالىق V حالىق وكىلدەرى جيناسىنىڭ ءتورتىنشى سەسسياسىنىڭ كەزەكتى وتىرىسىندا ەربول زىقانۇلى ءبىراۋىزدان قالالىق اكىمدىكتىڭ باسشىسى قىزمەتىنە سايلانعان.
1973 جىلى مامىر ايىندا قىتايدىڭ التاي وڭىرىندە دۇنيەگە كەلگەن ەربول زىقانۇلى جوعارى ءبىلىمدى. مەملەكەتتىك قىزمەتتەگى تاجىريبەسى مول تۇلعا بۇعان دەيىن بۋىرشىن اۋدانىنىڭ اكىمى جانە التاي ايماعى اكىمشىلىك باسشىسىنىڭ ورىنباسارى سەكىلدى جاۋاپتى قىزمەتتەردى اتقارعان.
2024 جىلدىڭ قازان ايىندا قحر شۇار اۋديتورلىق باسقارماسىنىڭ جەتەكشىسى قىزمەتىنەن چجانە قالالىق پارتيا كوميتەتى حاتشىسىنىڭ ورىنباسارى جانە قالا اكىمىنىڭ مىندەتىن اتقارۋشى بولىپ تاعايىندالدى.
ەربول زىقانۇلى – قىتايداعى ۇلتى قازاق مەملەكەتتىك قىزمەتكەرلەردىڭ اراسىندا شۇار اۋماعىنان تىس وڭىرلىك ماڭىزى بار قالاعا اكىم بولىپ سايلانعان العاشقى تۇلعا.
چجانە – قىتايدىڭ سولتۇستىك-باتىسىنداعى گانسۋ پروۆينتسياسىنا قاراستى جەرگىلىكتى ماڭىزى بار قالا. جالپى اۋدانى – 39 436,53 شارشى شاقىرىم، حالقىنىڭ سانى – شامامەن 1,2 ملن ادام. ونىڭ 97%-ى ەتنيكالىق قىتايلار. قالاعا تاۋەلدى ايماقتاردا دۇنگەن، موڭعول، تيبەت حالىقتارىنىڭ وكىلدەرىمەن قاتار، سارىۇيعىر حالقىنىڭ تاريحي مەكەندەرى بار.
