كەلەسى ۇلتتىق قۇرىلتاي بۋرابايدا وتەتىن بولدى. بۇل تۋرالى بۇگىن اۋىل شارۋاشىلىعى ەڭبەككەرلەرىنىڭ ءبىرىنشى فورۋمىندا پرەزيدەنت قاسىم-جومارت توقاەۆ ءمالىم ەتتى، دەپ حابارلايدى “ادىرنا” ۇلتتىق پورتالى.
پرەزيدەنت وسى قۇرىلتايدا قازاقستاندى ودان ءارى دامىتۋعا قاتىستى تىڭ جوسپارلاردى جاريا ەتپەك.
«بۇرىنعى جوسپاردىڭ ءبارىن قازىرگى كۇننىڭ تالابىنا لايىقتاپ، تۇزەتۋ قاجەت. مەن بۇعان دەيىن رەفورمالار توقتاپ قالمايتىنىن ناقتى ايتتىم. ويتكەنى ەلىمىزدى جان-جاقتى جاڭعىرتۋ ءىسى ۇزدىكسىز جالعاسا بەرۋگە ءتيىس. الدىمىزدا اۋقىمدى جۇمىس تۇر. سوعان ساي جاڭا باستامالار مەن جوسپارلاردى جۇزەگە اسىرامىز. قازىر ونىڭ ءبارى مۇقيات زەردەلەنىپ جاتىر. كەلەسى جىلى حالىققا ۇسىناتىن بولامىن. كەيبىر باستامانى ادەتتەگىدەي ۇلتتىق قۇرىلتايدا جاريالايمىن. ونىڭ كەزەكتى وتىرىسى بۋرابايدا وتەدى. قالعانىن جولداۋدا ايتامىن»، - دەدى توقاەۆ بۇگىنگى فورۋمدا.
ونىڭ ايتۋىنشا، ادىلەتتى قازاقستاندى قۇرۋ جولىندا ءالى دە كوپ جۇمىس ىستەۋ قاجەت.
«ول ءۇشىن جالپىۇلتتىق بىرەگەيلىگىمىزدىڭ نەگىزىن ۇدايى نىعايتىپ، مەملەكەتتىك باسقارۋدىڭ تيىمدىلىگىن ارتتىرىپ، ەكونوميكانى دايەكتى تۇردە دامىتۋ كەرەك. ەلدىك ماقساتتارىمىزدىڭ كوكجيەگىن كورە ءبىلۋ ماڭىزدى. سوندا عانا الدىمىزعا قويعان ستراتەگيالىق مىندەتتەردىڭ باعىتىنان اۋىتقىمايمىز. بوس اڭگىمەلەر مەن ونبەس داۋلاردى قۋماي، بولاشاققا سەنىممەن قادام باسۋىمىز كەرەك. باتىل باستامالارىمىزدى بىرگە جۇزەگە اسىراتىنىمىزعا سەنىمدىمىن»، - دەيدى پرەزيدەنت.
