26 جىل بويى ۆولەيبول فەدەراتسياسىن باسقارعان نۇرسۇلتان نازارباەۆتىڭ سەرىگى، ۇقك بۇرىنعى توراعاسى نۇرتاي ابىقاەۆ قىزمەتىنەن كەتتى. ەندى بۇل مىندەتتى قارجى ءمينيسترى ءمادي تاقيەۆ اتقارادى، دەپ حابارلايدى «ادىرنا» ءتىلشىسى.
27 قازاندا الماتىدا وتكەن فەدەراتسيانىڭ قورىتىندى ەسەپ بەرۋ كونفەرەنتسياسىندا ۇيىمنىڭ جاڭا پرەزيدەنتى تانىستىرىلدى. ءمادي تاقيەۆ دەلەگاتتارعا سەنىم بىلدىرگەنى ءۇشىن ريزاشىلىعىن جەتكىزىپ، نۇرتاي ابىقاەۆقا فەدەراتسيانىڭ قۇرمەتتى پرەزيدەنتى بولىپ، قۆف قامقورشىلىق كەڭەسىن باسقارۋدى ۇسىندى.
«قۇرمەتتى دوستار، ارىپتەستەر، مەيماندار، ۆولەيبول قوعامىنىڭ وكىلدەرى! فەدەراتسيانى باسقارۋ مىندەتىن جاڭا جەتەكشىلەرگە وتكىزۋ ۋاقىتى كەلدى. ءبىز 30 جىلدىق جولدى ارتقا تاستاپ، ۆولەيبول ەلىمىزدەگى وليمپيادالىق سپورت تۇرلەرى اراسىندا كوشباسشى ەكەنىن ماقتان تۇتامىز. 2028 جىلعا قاراي وتاندىق ۆولەيبول 100 جىلدىعىن اتاپ وتەدى. وسى ۋاقىتتا فەدەراتسيا جاڭا جەڭىستەر مەن جەتىستىكتەردى تىركەيدى دەپ ۇمىتتەنەمىن. ءبىز قول جەتكىزگەن جەتىستىكتەرىمىز تاريحتا ماڭگى قالادى، ال جاڭا جەتەكشىلىكتىڭ مىندەتى – ونى ودان ءارى ارتتىرۋ»،–دەدى نۇرتاي ابىقاەۆ.
ايتا كەتەيىك، ءمادي تاقيەۆ فەدەراتسيانى 2024-2028 جىلدار ارالىعىندا باسقارادى.
