قاسيەتتى ولكەدە تۋىپ-ءوسىپ، تۋعان جەرى مەن ەلىمىزدىڭ وركەندەۋىنە سۇبەلى ۇلەس قوسىپ جۇرگەن بىرقاتار تۇلعالارعا ۇلتتىق مەرەكە رەسپۋبليكا كۇنى قارساڭىندا ۇلىتاۋ وبلىسىنىڭ «قۇرمەتتى ازاماتى» اتاعى تابىس ەتىلدى. بۇل تۋرالى وبلىس اكىمى بەرىك ابدىعاليۇلى الەۋمەتتىك جەلىدەگى پاراقشاسىندا جازدى، دەپ حابارلايدى Egemen.kz.
قازاق ونەرىنىڭ الىبى، ۇلت مۇراسىنا ەڭبەگى سىڭگەن داۋىلپاز داۋىس يەسى، جاڭاارقا اۋدانىنىڭ تۋماسى قايرات اۋكەنۇلى بايبوسىنوۆقا ۇلىتاۋ وبلىسىنىڭ قۇرمەتتى ازاماتى اتاعى بەرىلدى.
سونىمەن قاتار ۇلىتاۋ وبلىسىنىڭ قۇرمەتتى ازاماتى اتاعى عالىم، قر ۇلتتىق عىلىم اكادەمياسىنىڭ پرەزيدەنتى، QazVac ۆاكتسيناسىن ازىرلەۋشى ۇلىتاۋ اۋدانى، قارساقباي كەنتىنىڭ تۋماسى كۇنسۇلۋ دالتونقىزى زاكارياعا، قازاقستاننىڭ قۇرمەتتى ءجۋرناليسى، قر جازۋشىلار وداعىنىڭ مۇشەسى، جازۋشى، ۇلىتاۋ اۋدانىنىڭ تۋماسى باتىربەك تيىشتىقبايۇلى مىرزابەكوۆكە، س.قوجامقۇلوۆ اتىنداعى جەزقازعان قازاق مۋزىكالىق دراما تەاترىنىڭ ءارتىسى، «قۇرمەت بەلگىسى» وردەنىنىڭ يەگەرى، قر حالىق ءارتىسى دوسجان ءابدىرالىۇلى جانبوتاەۆقا، قۇرمەتتى پروفەسسور، قانىش ساتباەۆ اتىنداعى «قۇرمەت» وردەنىنىڭ يەگەرى قايسار جۇماحانۇلى تەلەشوۆكە بەرىلدى.
«ۇلىتاۋ وبلىسىنىڭ قۇرمەتتى ازاماتتارىن بۇگىنگى ماراپاتتارىمەن شىن جۇرەكتەن قۇتتىقتايمىن! وبلىسىمىزدىڭ دامۋىنا ەل كولەمىندە ۇلەس قوسىپ، ايانباي ەڭبەكتەنىپ جۇرگەندەرىڭىزگە العىس بىلدىرەمىن»، دەپ جازدى بەرىك ابدىعاليۇلى.
