ورالدا بەلگىلى ايتىسكەر اقىن، قازاقستاننىڭ ەڭبەك سىڭىرگەن مادەنيەت قىزمەتكەرى، قوعام قايراتكەرى شولپان باتىرقىزى قىدىرنيازوۆا 76 جاسقا قاراعان شاعىندا دۇنيەدەن ءوتتى، دەپ حابارلايدى “ادىرنا” ۇلتتىق پورتالى.
شولپان قىدىرنيازوۆا 1949 جىلى 6 مامىردا باتىس قازاقستان وبلىسى، قاراتوبە اۋدانى، قاراكول اۋىلىندا دۇنيەگە كەلگەن. ول ادەبيەت پەن جۋرناليستيكا سالاسىندا جەمىستى ەڭبەك ەتىپ، قاراتوبە اۋداندىق «ەڭبەك تۋى» گازەتىندە قىزمەت اتقارعان.
اقىندىق ونەرىمەن تانىلعان ول 1980 جىلى رەسپۋبليكالىق اقىندار ايتىسىندا باس جۇلدەگە يە بولىپ، قازاق سسر-ءىنىڭ ەڭبەك سىڭىرگەن مادەنيەت قىزمەتكەرى اتاعىنا لايىق دەپ تانىلدى. اقىن ايتىس ساحناسىندا ەلۋدەن استام ايتىسقا قاتىسىپ، ءوز زامانىنىڭ ءسوز شەبەرلەرىمەن ءسوز قاعىستىرعان.
شولپان باتىرقىزى تەك ايتىسكەر اقىن عانا ەمەس، ءتىل ساياساتى مەن مادەنيەت سالاسىندا دا ءوز قولتاڭباسىن قالدىرعان تۇلعا. 2004-2008 جىلدارى باتىس قازاقستان وبلىسى تىلدەردى دامىتۋ باسقارماسىنىڭ باسشىسى رەتىندە وڭىردە مەملەكەتتىك ءتىل مەن ونوماستيكا سالاسىنىڭ دامۋىنا ايتارلىقتاي ۇلەس قوستى.
اقىننىڭ ايتىستارى «جىر شاشۋ»، «ون التى قىز، ءبىر جىگىت» جيناقتارىنا ەنگەن. سونداي-اق، ول «جازيرا» (1982), «ەركە قۇس» (1992), «ەلىگى ەركىن دالانىڭ…» (2004), «قوس قانات» (2010), «قاراتوبەم، قاسيەتتى قۇشاعىڭ» (2015), «مەنىڭ تاربيە ساعاتىم» (2016), «انادان – اقىل، اجەدەن – ادەپ» (2019) سىندى جىر، ايتىس جانە ناقىل سوزدەر جيناقتارىن جارىققا شىعاردى.
ەڭبەگى ەلەنىپ، «قۇرمەت» وردەنىمەن، «قازاقستان كونستيتۋتسياسىنا - 10 جىل»، «قازاقستان ءماسليحاتىنا - 20 جىل»، «ەرەن ەڭبەگى ءۇشىن» مەدالدارىمەن ماراپاتتالدى. قاراتوبە اۋدانىنىڭ قۇرمەتتى ازاماتى اتاندى.
