Алматы қаласының бұрынғы әкімі Ерболат Досаев қала активімен өткен кездесуде сөз сөйледі, деп хабарлайды “Адырна” ұлттық порталы ҚазТАГ-қа сілтеп.
«Ең алдымен, маған туған қалама ел тарихындағы ең қиын кезеңдердің бірінде қызмет етуге мүмкіндік бергені үшін Мемлекет басшысына шексіз алғысымды білдіргім келеді. Бұл мен үшін үлкен құрмет қана емес, зор жауапкершілік те болды. Жұмысымды бастаған сәттен бастап, осы жоғары сенімді ақтап, Алматыны орнықты даму жолына шығару үшін барлық білімім мен тәжірибемді салуға тырыстым. Соңғы үш жылдан астам уақыт мен үшін үлкен сынақтар мен тұрғындардың өмір сапасын жақсарту бағытындағы маңызды жетістіктерге толы кезең болды», – деді Ерболат Досаев сенбі күні.
Оның айтуынша, Президент тапсырмасымен және тікелей қолдауымен Алматының болашақ дамуын айқындайтын 20-дан астам стратегиялық құжат қабылданған. Олардың қатарында 2030 жылға дейінгі даму бағдарламасы, 2040 жылға дейінгі жаңа бас жоспар, көлік инфрақұрылымының мастер-жоспары және басқа да маңызды құжаттар бар.
«Соңғы үш жылда қаланың инженерлік инфрақұрылымы кең көлемде жаңғыртылды. 540 шақырым сумен жабдықтау және су бұру желілері, 480 шақырымнан астам электр желілері салынды және жаңартылды, 75 шақырым жаңа жол салынып, 650 шақырым жол жөнделді. Мемлекет басшысының туған қаласын дамытуға жеке қолдауының, алматылықтардың сенімі мен белсенді қатысуының арқасында біз бірге Алматының орнықты әлеуметтік-экономикалық дамуына берік негіз қаладық. Үш жыл ішінде қаланың экономикасы 20%-дан астам өсіп, 29 трлн теңгеден асты. Алматы бюджетінің кірісі 2022 жылдың басымен салыстырғанда 2,2 есе өсіп, 2,5 трлн теңгеге жетті», – деді экс-әкім.
Ол әкімдік жұмысының басты мақсаты — әлеуметтік инфрақұрылымды дамыту, мектептер мен балабақшалар салу арқылы алматылықтардың өмір сапасын жақсарту екенін атап өтті.
«Бұл мәселе Президенттің үнемі бақылауында. Соңғы үш жылдан астам уақыт ішінде қаламызда 57 білім беру мекемесі салынып, жаңғыртылды. 2022 жылы олардың саны 416 болса, бүгінде 434-ке жетті. 12 денсаулық сақтау нысаны салынды және жаңғыртылды, нәтижесінде Алматыдағы денсаулық сақтау саласының жабдықталу деңгейі 96,4%-ға жетті», – деді ол.
Сондай-ақ, ол Алматы экономикасын әртараптандыру негізгі бағыттардың бірі болғанын айтты.
«Үш жылдан астам уақытта қала экономикасына 5 трлн теңгеден астам инвестиция тартылды. Шағын және орта бизнестің экономикадағы үлесі алғаш рет 60%-дан асты. Ал ЕАЭО елдеріне Алматыдан шығарылатын дайын өнім экспорты үш есеге өсіп, 2024 жылдың қорытындысы бойынша 2 млрд АҚШ долларынан асты», – деді Досаев.
«Бұл жетістіктер Мемлекет басшысының тұрақты қолдауының, сіздердің – құрметті алматылықтар – белсенді қатысуыңыздың және кәсіби әрі қаланы сүйетін командамен бірлескен еңбектің арқасында мүмкін болды. Осы сәтті пайдалана отырып, бәріңізге шын жүректен алғысымды білдіремін. Мен Алматының жарқын болашағына – заманауи, дамыған мегаполиске айналатынына және тұрғындары үшін жайлы қала болатынына кәміл сенемін», – деп сөзін қорытындылады Ерболат Досаев.
Еске салайық, Ерболат Досаев Алматы қаласының әкімі қызметіне 2022 жылдың қаңтарында, Қаңтар оқиғаларынан кейін тағайындалған.
Related news
