Оқу-ағарту министрі Жұлдыз Сүлейменова ата-аналарды мұғалімдердің жеке уақытына құрметпен қарауға шақырды, деп хабарлайды "Адырна" тілшісі.
Оның айтуынша, ата-аналар чаттарындағы негізгі сұрақтар жұмыс уақытында, яғни кешкі сағат 18:00-ге дейін қойылуы керек.
Министрдің сөзінше, педагогтарды жұмыстан тыс уақытта артық мазаламауға қатысты жаңа талап енгізу мәселесі қарастырылып жатыр.
«Біздің ұстанымымыз нақты: ата-аналар чаттарында сағат 18:00-ге дейін сұрақтар қоюға болады деп есептейміз. Ал 18:00-ден кейін әр мұғалімнің жеке өмірі бар және оны құрметтеу қажет. Биыл "Педагог мәртебесі туралы" заңға өзгерістер енгізілді. Онда мұғалімнің сабақ уақытындағы және сабақтан тыс уақыттағы міндеттері, сондай-ақ мектептегі және оқу процесіндегі жауапкершілігі нақты көрсетілді», – деді оқу-ағарту министрі.
Дегенмен, мұғалімдерге кешкі сағат 18:00-ден кейін қоңырау шалуға немесе хабарлама жазуға тікелей тыйым салатын норма әзірге заңда қарастырылмаған.
Оқу-ағарту министрлігінің мәліметінше, педагогтердің міндеттері биыл «Педагог мәртебесі туралы» заңға енгізілген өзгерістер арқылы нақтыланған. Ал жұмыстан тыс уақытта ата-аналардың мұғалімдермен байланысу тәртібі тараптардың өзара келісімі арқылы белгіленуі мүмкін.
