АҚШ президенті Дональд Трамп пен Украина президенті Владимир Зеленскийдің Ақ үйдегі кездесуі шамамен бір сағатқа созылды, деп хабарлайды «Адырна» тілшісі BBC-ге сілтеме жасап.
Бұл соңғы екі айдағы екі президенттің үшінші жеке кездесуі болды. Кездесу жабық форматта, бұқаралық ақпарат құралдарының қатысуынсыз өткен.
Зеленский Трамппен өткен әңгімені жақсы бағалады.
«Сопақ кабинетте президент Трамппен жақсы кездесу өтті. Украиналықтардың өмірін қорғау және бейбітшілікке қол жеткізу жолында бірлесіп атқарып жатқан жұмыстарымыз үшін алғыс айтамын», – деп жазды ол Ақ үйден шыққаннан кейін әлеуметтік желіде.
Кейінірек Ақ үйдің баспасөз хатшысы Кэролайн Левитт Трамптың Зеленскиймен және Израиль премьер-министрі Биньямин Нетаньяхумен (ол Украина президентінен кейін бірден Ақ үйге келген – ред.) кездесулерін «оң әрі нәтижелі» деп сипаттады. Ал Трамптың өзі бұл кездесулер туралы әзірге пікір білдірген жоқ.
Зеленскийдің айтуынша, тараптар Patriot кешендеріне арналған тосқауылдаушы зымырандарды өндіру лицензияларын және «көмек бере алатын басқа да идеяларды» талқылаған. Алайда ол нақты қандай бастамалар сөз болғанын ашып айтпады.
Кездесуге дейін Reuters агенттігі украиналық және америкалық шенеуніктер Ресеймен әуе кеңістігіндегі бітім туралы ұсынысты талқылап жатқанын хабарлаған еді. Бұл бастама екі тараптың да әуе шабуылдарын тоқтатуын көздейді. Агенттік мәліметінше, ұсыныстар кейін Мәскеуге жолдануы мүмкін.
«Сондай-ақ дипломатия мәселесін талқыладық. Дипломатиялық үдерісті жандандыру маңызды», – деп жазды Зеленский.
Оның сөзінше, екі елдің келіссөз жүргізуші топтары алдағы байланыстардың егжей-тегжейін келісіп жатыр.
Зеленский Ақ үйден жариялаған фотосуреттерде оның кеңсесінің басшысы Андрей Ермак, орынбасары Павел Палиса, Украина сыртқы істер министрінің міндетін атқарушы Андрей Сибига, орынбасары Сергей Кислица және АҚШ-пен келіссөздердегі негізгі өкілдердің бірі Рустем Умеров та көрінеді.
Өткен аптада Зеленский АҚШ президентінің арнайы өкілдері Стив Уиткофф пен Джаред Кушнермен Ресеймен бейбіт келіссөздерді қайта жандандыру мүмкіндіктерін талқылаған болатын.
Сейсенбі күні кешірек Украина президенті әлеуметтік желіде Patriot жүйелеріне және өзге де қару-жарақ түрлеріне арналған зымырандар шығаратын Lockheed Martin компаниясының өкілдерімен де кездескенін хабарлаған еді.
