Қазақстанның Авиациялық әкімшілігінің бас директоры қызметіне АҚШ азаматы Майкл Дэниел тағайындалды. Бұл туралы Қазақстанның Көлік министрлігі мәлімдеді, деп хабарлайды “Адырна”.
Жаңа қызметінде Майкл Дэниелдің негізгі міндеттерінің бірі – Қазақстан мен АҚШ арасында тікелей әуе рейстерін ашу бағытында жұмыс жүргізу.
Майкл Дэниел еңбек жолын АҚШ-тың Азаматтық авиация федералдық басқармасында (FAA) бастаған. Ол бұл ұйымдағы қызметінде ұшу пайдалану инспекторы, әуе кемелерін сертификаттау жөніндегі маман, ұшу қауіпсіздігі қызметінің жетекшісі, сондай-ақ халықаралық бағдарламалар мен саясат бойынша аға менеджер сияқты бірқатар маңызды лауазымдарды атқарған.
Сонымен қатар, ол FAA-ның Франкфурт, Нью-Йорк және Вашингтон қалаларындағы халықаралық кеңселерінде жұмыс істеген. Бұдан бөлек, ол APEC-тің көлік қауіпсіздігі және авиациялық байланыс жөніндегі жұмыс тобын қоса алғанда, бірқатар халықаралық бастамаларды басқарған және Халықаралық азаматтық авиация ұйымымен ынтымақтастық жасаған.
