Талдықорғанда «Атажұрт» қозғалысына қатысты қылмыстық іс бойынша сот үкімі жарияланды, деп хабарлайды "Адырна" ұлттық порталы.
Іс бойынша барлығы 19 адам Қазақстан Республикасының Қылмыстық кодексінің 174-бабы («ұлтаралық араздықты қоздыру») бойынша айыпталған.
Сот барлық айыпталушыларды кінәлі деп танып, оларға түрлі жаза тағайындады. Бір бөлігіне 5 жылға бас бостандығынан айыру жазасы берілсе, кейбіріне бас бостандығын шектеу түріндегі жаза қолданылды. Сондай-ақ барлық сотталғандарға 3 жыл мерзімге қоғамдық-саяси қызметпен айналысуға тыйым салынды.
Іс материалдарына сәйкес, оқиға 2025 жылдың қарашасында Алматы облысы аумағында өткен наразылық акциясынан кейін басталған. Сол кезде белсенділер Қытайға қарсы ұрандар айтып, Қытай туы мен ҚХР басшысының бейнесін өртегені хабарланған.
Осыдан кейін құқық қорғау органдары белсенділерге қатысты қылмыстық іс қозғап, тергеу жүргізген.
Құқық қорғаушылар мен сарапшылар арасында бұл іске қатысты пікірлер әртүрлі. Кейбір құқық қорғаушылар белсенділердің қудалануының артында сыртқы ықпал, соның ішінде Қытай факторы болуы мүмкін деген болжам айтса, ресми органдар сот шешімін қылмыстық заңнама аясындағы іс деп бағалайды.
Айыпталушылар мен олардың жақтастары сот үкімімен келіспейтінін білдіріп, шешімге шағымданатынын мәлімдеген.
