Алматы қаласында Мемлекет басшысының 2,5 миллион ағаш егу жөніндегі тапсырмасын орындау бағытындағы жұмыстар жүйелі түрде жалғасып келеді. Бұл туралы Алматы қаласының әкімі Дархан Сатыбалды Қазақстан Республикасы Президенті жанындағы Орталық коммуникациялар қызметінде өткен брифинг барысында бұқаралық ақпарат құралдары өкілдерінің сауалына жауап беру кезінде мәлімдеді.
Қала әкімінің айтуынша, Алматыны көгалдандыруға бағытталған кешенді бағдарлама ұзақ мерзімге жоспарланған және 2030 жылға дейін кезең-кезеңімен жүзеге асырылады. Бүгінгі таңда аталған бағдарламаның шеңберінде жоспарланған жұмыстардың шамамен 50 пайызы орындалған. Соның нәтижесінде қала аумағында жасыл желек көлемі біртіндеп артып, экологиялық жағдайды жақсартуға бағытталған нақты қадамдар жасалуда.
Алдағы кезеңдерде көгалдандыру жұмыстары одан әрі жалғасып, қала аумағында қосымша шамамен 1,3 миллион ағаш пен бұта егу жоспарланып отыр. Бұл бастама мегаполистегі ауа сапасын жақсартуға, шаң-тозаң мен зиянды шығарындылардың деңгейін төмендетуге, сондай-ақ тұрғындар үшін қолайлы әрі жайлы қалалық орта қалыптастыруға бағытталған.
Сонымен қатар Алматы қаласының әкімі қаладағы көгалдандыру саясатына қатысты тәсілдер қайта қаралып жатқанын атап өтті. Атап айтқанда, ендігі кезекте тек егілетін ағаштардың санына ғана емес, олардың сапасына, бейімделу деңгейіне және ұзақ мерзімді тұрақтылығына ерекше көңіл бөлінетін болады. Осы мақсатта отырғызу технологиялары жаңартылып, ірі көлемді, яғни тез қалыптасатын және көзге көрнекі әсер беретін ағаш түрлерін пайдалану тәжірибесі енгізілуде.
Дархан Сатыбалдының айтуынша, бұл жұмыстар салалық мамандар мен сарапшылардың қатысуымен жүзеге асырылып жатыр. Қалалық экологияның ерекшеліктері мен жоғары көлік жүктемесі ескеріле отырып, Алматы жағдайына барынша бейімделетін ағаш түрлері мұқият іріктелуде. Қала басшысы алдағы уақытта көгалдандыру саласында сандық көрсеткіштерден гөрі жасыл желектің сапасы, төзімділігі және ұзақ мерзімді тиімділігі басты басымдыққа айналатынын атап өтті.
"iPhone, apartment, trip to Dubai and Italy": the anniversary of the ex-deputy surprised many people
