22–23 тамыз күндері «Аваза» ұлттық туристік аймағында Өзбекстан Республикасының президенті Шавкат Мирзиеевтің Түркіменстанға жұмыс сапары өтті. Сапар аясында Өзбекстан, Түркіменстан және Әзербайжан көшбасшыларының үшжақты кездесуі ұйымдастырылды, деп хабарлайды “Адырна”.
Келіссөздерге Өзбекстан президенті Шавкат Мирзиеев, Түркімен халқының ұлттық көшбасшысы, Халк Маслахатының Төрағасы Гурбангулы Бердімұхамедов және Әзербайжан президенті Ильхам Әлиев қатысты.
Тараптар сауда-экономика, көлік-коммуникация, энергетика және гуманитарлық салалардағы көпжақты ынтымақтастықты дамытуға қатысты кең ауқымды мәселелерді талқылады.
Мирзиеев Гурбангулы Бердімұхамедовті Авазада өткен Дамушы теңізге шыға алмайтын елдер жөніндегі БҰҰ-ның Үшінші конференциясының сәтті өтуімен құттықтап, сондай-ақ Әзербайжан президенті Ильхам Әлиевті Армениямен бейбітшілік декларациясын қабылдаумен шын жүректен құттықтады.
Көлік байланысы мен логистика мәселелеріне ерекше назар аударылды. Көшбасшылар үш елдің транзиттік әлеуетін тиімді пайдаланудың, қолданыстағы және болашағы бар көлік дәліздерін ұштастырудың маңызын атап өтті. Қытай – Өзбекстан теміржолын салу және Трансауған дәлізін жүзеге асыру жобасының өзектілігі де айтылды.
Орта дәлізді, оның ішінде Зангезур дәлізін дамыту жоспарлары қолдау тапты. Түрікменбашы мен Баку порттарында өткізу қабілетін арттыру, заманауи логистикалық инфрақұрылым құру, келісілген тарифтік саясат жүргізу және процестерді цифрландыру мәселелері талқыланды.
Энергетикалық қауіпсіздікті қамтамасыз ету мақсатында тараптар ынтымақтастықты тереңдетуге, экспорттық дәліздерді дамытуға және Еуропаға «жасыл» энергия жеткізу жобаларын іске асыруға мүдделілік білдірді. Каспий шельфіндегі көмірсутек кен орындарын барлау мен игеру бойынша серіктестік перспективалары да қаралды.
Тауар айналымын ұлғайту және өнеркәсіптік кооперацияны дамытуға ерекше мән берілді. Соңғы жылдары Өзбекстанның Түркіменстан және Әзербайжанмен өзара саудасы екі есеге өсіп, өнеркәсіптік өнімдердің үлесі 40 пайызға жеткені атап өтілді.
Өзбекстан президенті тұрақты сауда-логистикалық тізбектерді қалыптастыру, тарату орталықтарын құру, фитосанитарлық талаптарды бірыңғайлау, өнімдерді цифрлық таңбалау және электрондық сауда алаңдарын кеңейту жөніндегі іс-қимылдардың кешенді жоспарын бірлесіп әзірлеуді ұсынды.
Келіссөздер қорытындысы бойынша үш ел басшылары Бірлескен мәлімдеме мен бірқатар құжаттарға, оның ішінде көлік және логистика, кеме жасау және азаматтық авиация салаларындағы ынтымақтастық туралы меморандумдарға, сондай-ақ тауар-шикізат биржалары арасындағы өзара іс-қимыл туралы келісімге қол қойды.
Бірлескен баспасөз мәслихатында көшбасшылар келіссөздердің нәтижесін жоғары бағалап, қол жеткізілген уағдаластықтардың стратегиялық әріптестікті тереңдетудегі маңызын атап өтті.
Бірлескен жұмыстың өзара сауда көлемін арттыруға, көлік және энергетика жобаларын жедел іске асыруға, сондай-ақ гуманитарлық саладағы ынтымақтастықты жандандыруға мүмкіндік беретіні айтылды.
Сапар бағдарламасы аясында көшбасшылар ұлттық «Галкыныш» атқыштар тобының қойылымын тамашалады. Қонақтарға Түрікменстаннан тыс жерлерде де кең танымал ахалтеке жылқыларының өнері көрсетілді.
Құрмет пен достық белгісі ретінде Түркімен халқының ұлттық көшбасшысы Гурбангулы Бердімұхамедов Өзбекстан президентіне береке мен молшылықтың символы ретінде түйе мен ботаны сыйға тартты.
Жұмыс сапарының қорытындысы бойынша тараптар белсенді әрі нәтижелі бірлескен жұмысты жалғастыруға дайын екендіктерін растады. Түркіменбашы қаласының әуежайында Өзбекстан Республикасының Президентін Түркіменстанның ресми тұлғалары шығарып салды.
Авазадағы жиын кезінде Қазақстан президенті Қасым-Жомарт Тоқаев Бішкекке ресми сапармен барып, екіжақты кездесу өткізіп жатқан болатын.
