Қазақстан мұнайын тасымалдайтын танкерлерге шабуыл жасалды, деп хабарлайды "Адырна" ұлттық порталы Reuters агенттігіне сілтеп.
Мәліметке сәйкес, сейсенбі күні Каспий құбыр консорциумы (КҚК) терминалы маңында грек компаниялары басқаратын екі мұнай танкеріне ұшқышсыз ұшу аппараттары арқылы шабуыл жасалған. Аталған терминал арқылы Қазақстан мұнай экспортының шамамен 80 пайызы тасымалданады.
Алғашқы танкер – Delta Harmony – грекке тиесілі Delta Tankers компаниясының басқаруында. Дереккөздердің айтуынша, кеме «Теңізшевройл» консорциумы өндірген мұнайды тиеуі тиіс болған. Екінші танкер – Matilda – Thenamaris компаниясына тиесілі және Қарашығанақ кен орнынан мұнай тиеу жоспарланған.
Thenamaris компаниясының өкілі Matilda танкері КҚК терминалынан шамамен 30 миль қашықтықта, балласт күйінде күтіп тұрған кезде екі дронның соққысына ұшырағанын растады.
«Зардап шеккендер жоқ. Кеме палубалық құрылымдарынан аздаған зақым алды, алдын ала бағалау бойынша, олар толық жөндеуге жарамды. Танкердің теңізде жүзу қабілеті сақталған және ол қауіпті аймақтан шығып кетті», – деді компания өкілі.
Delta Tankers компаниясы Reuters агенттігінің пікір сұрауына жедел жауап бермеген.
Теңіз қауіпсіздігі саласындағы екі дереккөздің хабарлауынша, шабуылдан кейін кемеде өрт шыққан болуы мүмкін, алайда ол тез арада сөндірілген. Каспий құбыр консорциумы бұл оқиғаға қатысты түсініктеме беруден бас тартты.
КҚК мұнай құбыры Қазақстан мұнайын Ресейдің оңтүстігіндегі Новороссийск маңында орналасқан «Оңтүстік Озереевка» терминалына жеткізеді.
