Франция президенті Эмманюэль Макрон Қытайға үш күндік мемлекеттік сапармен барды, деп хабарлайды «Адырна» тілшісі.
Ол сауда мәселелерін талқылауды, сондай-ақ ҚХР-ды Ресейді Украинамен атысты тоқтатуға мүмкіндігінше тезірек келістіруге шақыруды жоспарлап отыр.
Елисей сарайының хабарлауынша, Эмманюэль Макрон елдер арасындағы сауда қатынастарында «тұрақты, орнықты өсімді» және «әділ, өзара тиімді нарыққа қолжетімділікті» қамтамасыз ету үшін тепе-теңдік орнатқысы келеді.
Сапар бағдарламасына сәйкес, 4 желтоқсанда Эмманюэль Макрон Бейжіңдегі Халық жиналысы үйінде ҚХР Төрағасы Си Цзиньпинмен кездеседі, кейін тараптар бизнес-форумға қатысады. Келесі күні Дуцзянъян қаласында келіссөздер өткізу жоспарланған.
Эмманюэль Макронды бизнес өкілдерінен құралған делегация ертіп жүр. Оның құрамында Airbus, EDF және Danone сияқты ірі корпорация басшылары бар.
«Біз Қытайдың Ресейді атысты барынша тез тоқтатуға көндіруіне және оған ықпал етуіне қол жеткізгіміз келеді. Бұл атысты тоқтатуды келіссөздер арқылы бекіту қажет, ал бұл келіссөздер, біздің ойымызша, Украина үшін берік қауіпсіздік кепілдіктеріне әкелуі тиіс», — деп мәлімдеді Associated Press агенттігіне француз дипломаты.
Айта кетейік, Франция президенті осымен 4-рет Қытайға ресми сапармен барып отыр.
