Қазақстандық танымал теннисші Зарина Дияс кәсіби мансабын аяқтады. Бұл туралы спортшы өзінің Instagram әлеуметтік желісіндегі парақшасында жазып, бала кезінен әлемдік аренада өнер көрсетуді армандағанын атап өтті, деп хабарлайды "Адырна".
Оның айтуынша, теннис оған тек спорт қана емес, өмірлік үлкен тәжірибе мен ұмытылмас сәттер сыйлаған.
Зарина Дияс халықаралық жарыстарда Қазақстанның намысын абыроймен қорғап, жоғары нәтижелерге қол жеткізді. Ол 2014 және 2015 жылдары Уимблдон турнирі аясында төртінші айналымға дейін жетіп, өзінің мықты ойыншы екенін дәлелдеді. Сонымен қатар, Жапонияда өткен WTA 250 санатындағы турнирде чемпион атанып, мансабындағы маңызды жетістіктердің біріне қол жеткізді.
Теннисші WTA рейтингінде 31-орынға дейін көтеріліп, әлемнің үздік ойыншыларының қатарына енді. Ол сондай-ақ халықаралық додаларда, оның ішінде Олимпиада ойындарында Қазақстан құрамасы сапында өнер көрсетті.
Мансабын қорытындылай келе, Зарина Дияс өз отбасына, әсіресе анасы мен апасына, сондай-ақ бапкерлері мен демеушілеріне, Қазақстан теннис федерациясы ұжымына алғысын білдірді.
Осылайша, отандық теннистің жарқын өкілдерінің бірі спорттағы кәсіби жолын аяқтап, жанкүйерлерінің есінде жарқын жетістіктерімен қалды.
