АҚШ-та атышулы қаржыгер Джеффри Эпштейнге тиесілі болған жеке ұшақ қараусыз қалған әуежай аумағынан табылды, деп хабарлайды "Адырна" ұлттық порталы Caliber.az басылымына сілтеме жасап.
Мәліметке сәйкес, «Лолита Экспресс» атанып кеткен ұшақ Джорджия штатындағы Брансуик қаласында орналасқан авиациялық компания аумағында шамамен он жыл бойы пайдаланылмай тұрған. The New York Post жариялаған ақпаратқа сәйкес, ұзындығы 40 метр болатын Boeing 727 (N908JE) 2016 жылдан бері әуеге көтерілмеген.
Жарияланған фотосуреттерден әуе кемесінің корпусы мен ішкі бөлігі уақыт өте келе айтарлықтай тозғаны байқалады. Ұшақ ашық аспан астында ұзақ сақталғандықтан, металл бөліктері коррозияға ұшырап, интерьері бүлінген. Журналистер ұшақ ішіндегі «зең иісі мүңкіген ауыр ауа» туралы да жазған.
Ұшақ салонында жатын бөлме, бірнеше демалыс аймақтары, ас үй және жуыну бөлмелері бар. Сонымен қатар, соңғы пайдаланылған кезеңнен қалған кейбір заттар да табылған.
Бұған дейін прокурорлар бұл ұшақтың кәмелетке толмағандарды заңсыз тасымалдау үшін пайдаланылғанын мәлімдеген. Ұшақ бортынан табылған заттардың ішінде жеке гигиена құралдары мен балаларға арналған өнімдер болғаны хабарланды.
Ақпарат құралдарының дерегінше, әр жылдары бұл ұшақта саясаткерлер мен іскерлік орта өкілдері де ұшқан. Соңғы рейс 2016 жылдың шілде айында орын алған. Содан бері әуе кемесі техникалық қызмет көрсетілмей, электр қуатынсыз қалған.
Сарапшылардың пікірінше, қазіргі техникалық жағдайына байланысты ұшақты қайта пайдалануға мүмкіндік жоқ.
